ឃាត់ខ្លួនស្ត្រីម្នាក់ ដកហូតគ្រឿងញៀន ៦កញ្ចប់ នៅខេត្តកំពង់ធំ
ខេត្តកំពង់ធំ៖ កាលពីថ្ងៃទី១៨ ខែកក្កដា ឆ្នាំ២០២១ ម្សិលមិញ កម្លាំងជំនាញការិយាលយ័ប្រឆាំងគ្រឿងញៀន បានចុះបង្ក្រាបករណីរក្សាទុក ជួញដូរ និងផ្តល់ទីតាំងប្រើប្រាស់គ្រឿងញៀន ដោយឃាត់ខ្លួនជនសង្ស័យម្នាក់ នៅត្រង់ចំណុចផ្ទះបណ្តែតទឹក ក្នុងតំបន់ព្រែកខ្សាច់ព្រំប្រទល់ ខេត្តកំពង់ឆ្នាំង និងខេត្តកំពង់ធំ ស្ថិតក្នុងភូមិកោះតាពៅ ឃុំកំពង់ស្វាយ ស្រុកផាត់សណ្តាយ ខេត្តកំពង់ធំ។
មន្ត្រីនគរបាលស្រុកផាត់សណ្តាយ បានឲ្យដឹងថា ជនសង្ស័យម្នាក់ ឈ្មោះ អឿ សុផល ភេទស្រី អាយុ៤០ឆ្នាំ ជនជាតិខ្មែរ មុខរបរមិនពិតប្រាកដ រស់នៅភូមិកោះតាពៅ ឃុំផាត់សណ្តាយ ស្រុកកំពង់ស្វាយ ខេត្តកំពង់ធំ ។
ចំពោះវត្ថុតាងដកហូតរួមមាន៖ ថ្នាំញៀនមេតំហ្វេតាមីន (ice) ចំនួន ៦កញ្ចប់ ស្មើ ៤៣,៨២ក្រាម, កេតាមីនចំនួន ០១កញ្ចប់ ស្មើ ០,៩៥ក្រាម, wyចំនួន ០១កញ្ចប់ ស្មើ ០៤គ្រាប់, ទូរស័ព្ទ ០១គ្រឿង, ឧបករណ៍វេចខ្ចប់ និងសម្ភារជក់ថ្នាំញៀនមួយចំនួន ។
បច្ចុប្បន្នជនសង្ស័យ រួមនឹងវត្ថុតាងត្រូវបានសមត្ថកិច្ចបញ្ជូនមកការិយាល័យជំនាញ កសាងសំណុំរឿង ដើម្បីចាត់ការតាមនីតិវិធី ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។