អាមេរិក-វៀតណាមបង្កើនទំនាក់ទំនងសន្តិសុខ ការពារជាតិកាន់តែប្រសើរ
រដ្ឋមន្ត្រីការពារជាតិអាមេរិកលោក Lloyd Austin នៅថ្ងៃព្រហស្បតិ៍នេះ កំពុងស្ថិតក្នុងប្រទេសវៀតណាម ដើម្បីស្វែងរកការលើកកម្ពស់ ចំណងទាក់ទងនៃវិស័យសន្តិសុខរវាងភាគីទាំងពីរ។
មុនជំនួបពិភាក្សាជាមួយរដ្ឋមន្ត្រីការពារជាតិវៀតណាម នៅទីក្រុងហាណូយ លោក អូស្ទីន បានថ្លែងថា សហរដ្ឋអាមេរិកមិនបានស្នើឲ្យ វៀតណាមដាច់ខាតត្រូវ ជ្រើសរើសយកប្រទេសណាមួយឡើយ។ ប្រមុខការពារជាតិអាមេរិក បាននិយាយដូច្នេះថា «គោលដៅកណ្តាលមួយរបស់យើង គឺធានាថាសម្ព័ន្ធមិត្តក៏ដូចជាដៃគូនានា របស់សហរដ្ឋអាមេរិក មានសិទ្ធិសេរីភាពពេញលេញ ដើម្បីកំណត់អនាគតដោយខ្លួនឯង»។
ខណៈទំនាក់ទំនងយោធារវាងអាមេរិកនិងវៀតណាម កំពុងមានភាពកាន់តែស៉ីជម្រៅទៅៗ រដ្ឋបាលប្រធានាធិបតីអាមេរិក លោក ចូ បៃដិន បានលើកឡើងថា វានៅមានកម្រិតនៅឡើយក្នុងចំណងទាក់ទងប្រទេសទាំងពីរ លុះត្រាតែទីក្រុងហាណូយ សម្រេចបាននូវឌ្ឍនភាព លើបញ្ហាសិទ្ធិមនុស្ស។
គួរបញ្ជាក់ថា លោក អូស្ទីន មិនបានលើកឡើងចំឈ្មោះប្រទេសចិនទេ ប៉ុន្តែបច្ចុប្បន្នមានទស្សនៈយល់ឃើញថា នៅតំបន់អាស៉ី ភាពតានតឹងរវាង សហរដ្ឋអាមេរិកនិងចិនកំពុងកើនឡើង ដែលរហូតដល់ថ្នាក់អាចត្រូវបង្ខំឲ្យប្រទេសនីមួយៗ ធ្វើការជ្រើសរើសរវាងមហាអំណាចទាំងពីរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។