ធ្លាយដំណឹងថា ប្រធានការិយាល័យភូមិបាលស្រុកស្ទោង ត្រូវថ្នាក់លើដកចេញពីតំណែង ព្រោះតែប្រព្រឹត្តអំពើទុកលួយច្រើនពេក
ខេត្តកំពង់ធំ៖ ប្រភពមន្រ្តីរដ្ឋបាលស្រុកស្ទោង បានឲ្យដឹងថា ពេលនេះគណៈឯកភាពស្រុក កំពុងត្រៀមធ្វើការដកលោក លឹម ប៊ុនហេង ប្រធានការិយាល័យភូមិបាលស្រុកស្ទោងហើយ ក្រោយពីមានការផ្តិតមេដៃតវ៉ាពីប្រជាពលរដ្ឋ ព្រោះតែប្រធានការិយាល័យភូមិបាលស្រុករូបនេះ ប្រព្រឹត្តអំពើពុករលួយ ឃុបឃិតជាមួយឈ្មួញឲ្យមានការសាងសង់ផ្ទះលើចំណីផ្លូវជាតិលេខ៦ ។
ប្រភពច្បាស់ការបានឲ្យដឹងថា កន្លងមកមានពួកនាយទុនជាច្រើននាក់បានឆ្លៀតឱកាស ក្នុងអណ្ណត្តិលោក លោកលឹម ប៊ុនហេង ប្រធានការិយាល័យភូមិបាលស្រុកស្ទោង បានឃុបឃិតប្រព្រឹត្តអំពើពុករលួយ សាងសង់ផ្ទះលើដីហាមឃាត់ជាច្រើនគ្រួសារ ដើម្បីបន្តបើកហាងលក់ទំនិញជាបន្តបន្ទាប់ ដែលជាទង្វើខុសច្បាប់ផ្ទុយពីអនុក្រឺត្យណែនាំរបស់រាជរដ្ឋាភិបាល ។
មួយវិញទៀត លោក លឹម ប៊ុនហេង ប្រធានការិយាល័យភូមិបាលស្រុកស្ទោង ក៏បានធ្វើឲ្យប្រជាពលរដ្ឋមិនពេញចិត្តផងដែរ តាមរយៈការដើរគៀបសង្កត់ប្រជាពលរដ្ឋ នៅពេលពួកគាត់រត់ការដើម្បីកាត់ប្លង់ដី ដោយបុគ្គលរូបនេះយកលើសពីកំរ៉ៃសេវាដែលអន្តរក្រសួងបានប្រកាស ដូចជាកាត់ប្លងដីមូយប្លង់ ត្រូវអស់លុយពី ៨០០រហូតរាប់ពាន់ដុល្លារ ចំណែកអ្នកសាងសង់ផ្ទះ យកពីគេ ៥០០ រហូតដល់៣០០០ដុល្លារជាដើម ។
ចំពោះករណីនេះ យើងមិនអាចស្វែងរកការបំភ្លឺពីលោក លឹម ប៊ុនហេង បានទេនៅថ្ងៃនេះ។
យ៉ាងណាក៏ដោយ ក្រោយពីទទួលដំណឹងថា ថ្នាក់លើនឹងដកតំណែងប្រធានការិយាល័យភូមិបាលស្រុកស្ទោង ប្រជាពលរដ្ឋរស់នៅក្នុងស្រុកស្ទោង ខេត្តកំពង់ធំ បានសម្តែងនូវសេចក្តីត្រេតអរ ជាខ្លាំង ដោយសារតែកន្លងមកប្រជាពលរដ្ឋរងទុក្ខនិងការគៀបសង្កត់ជាយូរមកហើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។