ភ្លើងឆេះព្រៃនៅកាលីហ្វ័រញ៉ាបានបំផ្លាញផ្ទះជាង ១០០ខ្នង
សារព័ត៌មានស៉ីនហួរ នៅល្ងាចថ្ងៃពុធ ទី១៣ ខែតុលា ឆ្នាំ២០២១ បានផ្សាយថា ភ្លើងឆេះព្រៃដែលរាលដាលយ៉ាងឆាប់រហ័សមួយ នៅភាគខាងត្បូងរដ្ឋកាលីហ្វ័រញ៉ានៃសហរដ្ឋអាមេរិក បានឆាបឆេះផ្ទៃដីរហូតដល់ ៥៥គីឡូម៉ែត្រក្រឡា។ មកទល់ពេលនេះ វាត្រូវក្រុមភ្នាក់ងារពន្លត់អគ្គីភ័យគ្រប់គ្រងបានត្រឹមតែ ៥ភាគរយប៉ុណ្ណោះ ខណៈអាជ្ញាធរបានបង្គាប់ឲ្យប្រជាជនជម្លៀសខ្លួន និងបិទផ្លូវហាយវេសំខាន់មួយកន្លែងថែមទៀត។
ភ្លើងឆេះព្រៃខាងលើឈ្មោះថា អាលីសាល់ ហ្វាយអឺ (Alisal Fire) ដែលបានចាប់ផ្តើមឡើង កាលពីថ្ងៃចន្ទដើមសប្តាហ៍នេះ នៅក្បែរបឹង Alisal ភាគខាងជើងផ្លូវហាយវេលេខ ១០១ ក្នុងតំបន់ សាន់តា បាបារ៉ា (Santa Barbara)។ វាកំពុងរងការជំរុញពីខ្យល់បោកបក់ខ្លាំង ហើយរាលដាលក្នុងល្បឿនយ៉ាងលឿន។ អាជ្ញាធរនៃតំបន់ Santa Barbara បានសេចក្តីព្រមាន និងបញ្ជាឲ្យជម្លៀសខ្លួនសម្រាប់សហគមន៍នានា ដែលរងការគំរាមកំហែងពីភ្លើងឆេះព្រៃ។
ចំណែកផ្លូវហាយវេលេខ ១០១ ក៏ត្រូវបានបិទទាំងស្រុងជាបណ្តោះអាសន្នផងដែរ។ ភ្នាក់ងារពន្លត់អគ្គីភ័យសរុបជាង ៦០០នាក់ កំពុងព្យាយាមគ្រប់គ្រងភ្លើងឆេះព្រៃនេះ ដែលកំពុងបង្កការគំរាមកំហែង ចំពោះសំណង់យ៉ាងហោច ១០០ខ្នង រួមមានលំនៅឋាន កសិដ្ឋាន ទីលានបោះជំរំ និងស្ថានីយរថភ្លើងជាដើម។
គួរបញ្ជាក់ថា បើគិតនៅទូទាំងរដ្ឋកាលីហ្វ័រញ៉ាតែម្តង ភ្លើងព្រៃឆេះនៅកន្លែងផ្សេងៗគ្នា បានឆាបឆេះផ្ទៃដីសរុបលើសពី ១០,០០០គីឡូម៉ែត្រក្រឡា ព្រមទាំងបំផ្លាញឬបង្កការខូចខាតចំពោះសំណង់អគារច្រើនជាង ៣,៦០០ខ្នងរួចមកហើយ នៅក្នុងឆ្នាំ២០២១នេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។