ម៉ាឡេស៊ីរិតបន្តឹងការចាក់វ៉ាក់សាំងប្រឆាំងកូវីដ១៩ ក្នុងជួរមន្ត្រីរាជការ
ការចាក់វ៉ាក់សាំងទោះបីមិនមែនជាការបង្ខិតបង្ខំ ប៉ុន្តែបានក្លាយទៅជាកតព្វកិច្ច ដោយមន្ត្រីរាជការ គ្រប់ស្ថានប័នទាំងអស់ ក៏ដូចជាបុគ្គលិកក្រុមហ៊ុន បានដាក់បម្រាមតឹងតែងចំពោះអ្នកមិនចាក់វ៉ាក់សាំង នឹងមិនអនុញ្ញាតឲ្យចូលធ្វើការនោះឡើយ។
ក្នុងពេលនេះដែរ ម៉ាឡេស៊ីបានអនុម័ត មន្ត្រីរាជការដែលមិនចាក់វ៉ាក់សាំងកូវីដ១៩ អាចប្រឈមនឹងការដាក់ពិន័យ ឬបណ្តេញចេញពីស្ថាប័ន ប្រសិនបើពួកគេមិនបានទទួលការចាក់វ៉ាក់សាំងបង្ការជំងឺកូវីដ១៩ ក្រោមគោលនយោបាយចាក់ថ្នាំបង្ការថ្មី ដែលនឹងចូលជាធរមានចាប់ពីថ្ងៃទី០១ ខែវិច្ឆិកា។
សារាចរមួយដែលបានបង្ហោះនៅក្នុងគេហទំព័ររបស់នាយកដ្ឋានសេវាកម្មសាធារណៈ (PSD) នៅថ្ងៃចន្ទ ទី១៨ ខែតុលានេះបានគូសបញ្ជាក់ថា មន្ត្រីរាជការអាចត្រូវបានណែនាំឱ្យបំពេញការចាក់វ៉ាក់សាំងរបស់ពួកគេឲ្យគ្រប់ដូស មុនកាលបរិច្ឆេទចូលជាធរមានមកដល់។
សេចក្តីណែនាំដែលស្ថិតនៅក្រោមគោលការណ៍អនុវត្តវិធានការចាក់វ៉ាក់សាំងបង្ការកូវីដ-១៩ របស់ PSD សម្រាប់មន្ត្រីសេវាសាធារណៈសហព័ន្ធ បានព្រមានថា ការមិនអនុលោមតាមគោលនយោបាយនេះអាចនឹងទទួលការផាកពិន័យ ឬបញ្ចប់សេវាកម្ម។
យោងតាមសារាចរដែលចុះហត្ថលេខាដោយអគ្គនាយក PSD លោក Mohd Khairul Adib Abd Rahman លើកឡើងថា «នៅថ្ងៃទី០១ ខែវិច្ឆិកា ឆ្នាំ២០២១ ឬក្រោយនេះ មន្ត្រីណាដែលមិនគោរពតាមសេចក្តីណែនាំរបស់ប្រធាននាយកដ្ឋានអាចនឹងទទួលការផាកពីន័យ ឬបញ្ឈប់ពីការងារតែម្តង»។
គួរបញ្ជាក់ថា ចំនួនករណីឆ្លងប្រចាំថ្ងៃនៅក្នុងប្រទេសម៉ាឡេស៊ីមាននិន្នាការធ្លាក់ចុះចាប់តាំងពីដើមខែតុលា ដោយធ្លាក់ចុះដល់តួលេខ៤ ខ្ទង់ កាលពីថ្ងៃទី០៣ ខែតុលាកន្លងទៅ ហើយជាលើកដំបូងចាប់តាំងពីខែកក្កដា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។