សមត្ថកិច្ច បង្ក្រាបគ្រឿងញៀនជិត ៥៩គីឡូក្រាម ចាប់ខ្លួនជនសង្ស័យ ២នាក់ នៅរាជធានីភ្នំពេញ
ភ្នំពេញ៖ នៅថ្ងៃទី៣ ខែវិច្ឆិកា ឆ្នាំ២០២១នេះ កម្លាំងជំនាញ នៃមន្ទីរប្រឆាំងគ្រឿងញៀន បានបង្ហាញមុខជនសង្ស័យចំនួន ២នាក់ ក្នុងករណីបង្ក្រាបគ្រឿងជិត ៥៩គីឡូក្រាម នៅរាជធានីភ្នំពេញ។
បើតាមរបាយការពីសមត្ថកិច្ច បានបញ្ជាក់ថា ក្នុងប្រតិបត្តិការនេះ បានធ្វើឡើងកាលពីវេលាម៉ោង១៤ និង២០នាទីរសៀល ថ្ងៃទី៣១ ខែតុលា ឆ្នាំ២០២១ នៅចំណុចផ្លូវលេខ៣៦០ សង្កាត់បឹងកេងកង១ ខណ្ឌបឹងកេងកង រាជធានីភ្នំពេញ ដោយចាប់បានជនសង្ស័យម្នាក់ ឈ្មោះ ង្វៀង វីងទី ភេទប្រុស អាយុ ២៦ឆ្នាំ ជនជាតិ វៀតណាម និងសារធាតុញៀនមួយចំនួនតូច។ លុះដល់ម៉ោង១៥ និង៣០នាទី ថ្ងែដដែល កម្លាំងជំនាញ បានធ្វើការឆែកឆេរ និងចាប់ខ្លួនជនសង្ស័យម្នាក់ទៀត ឈ្មោះ ហេង គឹមហេង ភេទប្រុស អាយុ ២៥ឆ្នាំ ជនជាតិខ្មែរ នៅចំណុចបន្ទប់ជួលលេខ៧ ផ្លូវលេខ៣០០ ក្រុម១៩ សង្កាត់បឹងកេងកង២ ខណ្ឌបឹងកេងកង រាជធានីភ្នំពេញ។
ចំណែកវត្ថុតាងចាប់បាន៖ មេតំហ្វេតាមីន(ICE)ទម្ងន់សុទ្ធ ៣.៥១ក្រាម, កេតាមីន ទម្ងន់សុទ្ធ ៥០.៤២ក្រាម, អ៊ិចស្តាស៊ីទម្ងន់សុទ្ធ ១គ.ក្រ ៥១៧.៣២ក្រាម, មេកាទីណូនទម្ងន់សុទ្ធ ៤៦ គ.ក្រ ៧៧៤ក្រាម, សរុបទម្ងន់ ៥៨ គ.ក្រ ៣៤៥.២៥ក្រាម និងសារធាតុផ្សំ(មិនច្បាស់) ៦គ.ក្រ ២១៤.៣៦ក្រាម។
បច្ចុប្បន្នជនសង្ស័យ និងវត្ថុតាងខាងលើ បានកសាងសំណុំរឿង បញ្ជូនទៅសាលាដំបូងរាជធានីភ្នំពេញតាមនីតិវិធី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។