យុវជនម្នាក់បាត់បង់ជីវិត ដោយសារគ្រោះថ្នាក់ចរាចរណ៍ នៅផ្លូវក្រវ៉ាត់ក្រុងសៀមរាប
របាយការណ៍របស់នគរបាលចរាចរណ៍ខេត្តសៀមរាបបានឲ្យដឹងថា នៅវេលាម៉ោងប្រមាណ ១២ និង៣៧នាទីថ្ងៃពុធទី១០ ខែ វិច្ឆិកា ឆ្នាំ២០២១ ត្រង់ចំណុចផ្លូវបំបែកជា៤សាលាខៀវ ស្ថិតនៅភូមិត្រពាំងត្រែង សង្កាត់សាលាកំរើក ក្រុងសៀមរាប លើផ្លូវក្រវ៉ាត់ក្រុង (ប៉េតុង) មានគ្រោះថ្នាក់ចរាចរណ៍មួយរវាងរថយន្តនិងម៉ូតូបណ្ដាលឱ្យយុវជនម្នាក់បានស្លាប់បាត់បង់ជីវិតយ៉ាងអាណោចអាធ័ម។
បាយការណ៍បានបន្តថា គ្រោះថ្នាក់ចរាចរណ៍នេះកើតឡើងរវាងរថយន្តម៉ាក្សហ៊ីយ៉ាន់ដាយ ពណ៌ស + ខៀវ ពាក់ ផ្លាកលេខក្រុងព្រះសីហនុ 3A5541(មុខ) កន្ទុយក្រោយស្លាកលេខកំពុងចាម 4A.1780 ទិសដៅពីលិច ទៅកើត (អ្នកបើកបររត់គេចខ្លួនបាត់) បានបុកម៉ូតូមួយគ្រឿងម៉ាក ZOOMER ពណ៌ខ្មៅ ផ្លាកលេខ សៀមរាប 1Y.6884 អ្នកបើកបរឈ្មោះឡេង បញ្ញការ ភេទប្រុស អាយុ២៩ឆ្នាំ រស់នៅភូមិត្រពាំងសេះ សង្កាត់ គោកចក ក្រុងសៀមរាប ខេត្តសៀមរាប ទិសដៅពីត្បូងមកជើង(ឆ្លងថ្នល់)បណ្តាលឲ្យស្លាប់នៅនឹងកន្លែងកើតហេតុ។
របាយការណ៍ក៏បានបញ្ជាក់ផងដែរថា ម៉ូតូខូចខាតធ្ងន់ ចំណែករថយន្តខូចខាតស្រាល។ ក្រោយពីបានចុះធ្វើការវាស់វែងរួច សមត្ថកិច្ចបានប្រគល់សាកសពឲ្យក្រុមគ្រួសារយកទៅធ្វើបុណ្យតាមប្រពៃណី។
យ៉ាងណាក៏ដោយ សមត្ថកិច្ចនគរបាលនៅមិនទាន់បញ្ជាក់អំពីមូលហេតុនៃគ្រោះថ្នាក់ចរាចរណ៍នេះនៅឡើយទេ។
ជាមួយគ្នានេះអង្គភាពសារព័ត៌មានខ្មែរ៧មករា ក៏សុំចូលរួមរំលែកទុក្ខ ជាមួយគ្រួសារជនរងគ្រោះ ដែលកូនបាន ទទួលមរណៈភាព ដោយសារគ្រោះថ្នាក់ចរាចរណ៍ នៅផ្លូវក្រវ៉ាត់ក្រុងសៀមរាបនេះផង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។