កម្ពុជា នឹងមានសារមន្ទីរអូឡាំពិកថ្មីមួយ នៅក្នុងពហុកីឡដ្ឋានជាតិមរតកតេជោ
ភ្នំពេញ៖ យោងតាមអគ្គលេខាធិការ គណៈកម្មាធិការជាតិអូឡាំពិកកម្ពុជាលោក វ៉ាត់ ចំរើនកាលពីដើមសបា្តហ៍កន្លងទៅ បានបញ្ជាក់ថា សារមន្ទីរអូឡាំពិកថ្មីមួយ នឹងកើតមាននៅក្នុងសំណង់ប្រវត្តិសាស្ត្រកីឡាថ្មីរបស់កម្ពុជា គឺពហុកីឡដ្ឋានជាតិមរតក តេជោ នៅខណ្ឌជ្រោយចង្វារ រាជធានីភ្នំពេញ ដោយការរៀបចំសារមន្ទីរអូឡាំពិកនេះ ក្រោមជំនួយរបស់ក្រុម ប្រឹក្សា កីឡាអូឡាំពិកអាស៊ី។
លោក វ៉ាត់ ចំរើន មានប្រសាស៍ថា នៅក្នុងបេសកកម្មអន្តរជាតិនេះ គឺទី១-កម្ពុជាបានចូលរួមមហាសន្និបាត ក្រុម ប្រឹក្សាកីឡាអូឡាំពិកអាស៊ី ក្នុងនាមជាសមាជិកពេញសិទ្ធិ។ ទី២-គឺកម្ពុជាទទួលបានសិទ្ធិជាផ្លូវការ ក្នុងការ ទទួល រៀបចំធ្វើជាម្ចាស់ផ្ទះ ការប្រកួតកីឡាយុវជនអាស៊ី (ASIAN YOUTH GAMES) លើកទី៥ នាឆ្នាំ២០២៩។ ទី៣-គឺកម្ពុជាទទួលបានជំនួយមួយចំនួនលើផ្នែកអប់រំស្មារតីអូឡាំពិក ដោយក្រុមប្រឹក្សាកីឡាអូឡាំពិកអាស៊ី បាន សម្រេច ផ្តល់ជំនួយកសាងសារមន្ទីរអូឡាំពិក នៅពហុកីឡដ្ឋានជាតិមរតកតេជោ ដែលជាមជ្ឈមណ្ឌល អូឡាំពិកដ៏ ធំមួយ ផ្ទុកនូវឯកសារប្រវត្តិ នៃចលនាអូឡាំពិកជាតិ ហើយក៏ជាកន្លែងប្រមូលតាំងបង្ហាញសម្រាប់ ការស្រាវជ្រាវ នូវ ឯកសារកីឡាធំៗ អ្នកល្បីល្បាញនៅលើពិភពលោកផងដែរ។
នេះគឺជាលទ្ធផលធំៗចំនួន៣ ដែលកម្ពុជាទទួល បានពីអង្គមហាសន្និបាតក្រុមប្រឹក្សាកីឡាអូឡាំពិកអាស៊ី លើកទី៤០ ប្រចាំឆ្នាំ២០២១។
លោក វ៉ាត់ ចំរើន បានចាត់ទុកថា «នេះជាបេសកកម្មជោគជ័យដ៏ត្រចេះត្រចង់ និងជាមហាកិត្តិយសរបស់ព្រះ រាជា ណាចក្រកម្ពុជា ក្រោមចក្ខុវិស័យដ៏ត្រឹមត្រូវរបស់ប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន ដែលអនុញ្ញាតឱ្យគណៈប្រតិភូកីឡាកម្ពុជា ចូលរួមក្នុងបេសកកម្មនាពេលនេះទទួលបានលទ្ធផលជោគជ័យ ប្រកបដោយមោទនភាពបំផុត»៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។