អាកាសយានដ្ឋានអន្តរជាតិសៀមរាប ត្រៀមលក្ខណៈរួចរាល់ សម្រាប់ការស្វាគមន៍ភ្ញៀវទេសចរវ៉ាក់សាំងពេញលេញ ចូលមកទស្សនាខេត្តសៀមរាប
ខេត្តសៀមរាប៖ ឯកឧត្តម ប៊ុន រដ្ឋា នាយកអាកាសយានដ្ឋានអន្តរជាតិសៀមរាប លើកឡើងថា រាជរដ្ឋាភិបាលកម្ពុជា បានអនុញ្ញាតឱ្យទេសចរអន្តរជាតិ និងអ្នកដំណើរដែលបានចាក់វ៉ាក់សាំងកូវីដ-១៩ ពេញលេញ ចូលក្នុងព្រះរាជាណាចក្រកម្ពុជា ដោយមិនតម្រូវឱ្យធ្វើចត្តាឡីស័ក្តិ ចាប់ពីថ្ងៃទី១៥ ខែវិច្ឆិកា ឆ្នាំ២០២១ នេះតទៅ ដូច្នេះ ការបើកប្រទេសឡើងវិញនោះ គឺក្រោមមោទនភាពនៃការផ្តល់វាក់សាំងជូនប្រជាពលរដ្ឋក្នុងកម្រិតភាគរយខ្ពស់ដែលពិភពលោកទទួលស្គាល់ ការបើកទទួលភ្ញៀវទេសចរវ៉ាក់សាំងពេញលេញរបស់កម្ពុជា អាចថាជាការរង់ចាំរបស់ភ្ញៀវទេសចរអន្តរជាតិ។
ឯកឧត្តម ប៊ុន រដ្ឋា បានប្រកាសបែបនេះ ក្នុងកិច្ចសម្ភាសន៍មួយ ក្រោយបញ្ចប់កិច្ចប្រជុំពិភាក្សា ស្តីអំពីកិច្ចប្រតិបត្តិស្តង់ដារវិធានសុវត្តិភាព SOP ដើម្បីទទួលភ្ញៀវទេសចរវាក់សាំងពេញលេញ នៅអាកាសយានដ្ឋានអន្តរជាតិសៀមរាប កាលពីរសៀលថ្ងៃទី២៤ ខែវិច្ឆិកា ឆ្នាំ២០២១កន្លងទៅថ្មីនេះ។
ឯកឧត្តម ប៊ុន រដ្ឋា មានប្រសាសន៍ថា ក្រោមកិច្ចសហប្រតិបត្តិការជាមួយមន្ទីរសុខាភិបាលនៃរដ្ឋបាលខេត្តសៀមរាប អាកាសយានដ្ឋានអន្តរជាតិសៀមរាប បានត្រៀមលក្ខណៈរួចរាល់ហើយ សម្រាប់ការស្វាគមន៍ភ្ញៀវទេសចរវ៉ាក់សាំងពេញលេញ ដែលចូលមកទស្សនាកម្សាន្តក្នុងខេត្តសៀមរាប ខណៈកម្ពុជាបានកំណត់ក្នុងបញ្ជីសម្រាប់បណ្តាប្រទេសមួយចំនួននៅលើពិភពលោកមកកាន់កម្ពុជា ដោយមិនចាំបាច់តម្រូវឲ្យមានវីហ្សានោះឡើយ ជាពិសេសបណ្តាប្រទេសនៅក្នុងតំបន់អាស៊ី ដែលនេះគឺជាគោលនយោបាយបើកចំហរជើងមេឃរបស់កម្ពុជា។
ឯកឧត្តមនាយកអាកាសយានដ្ឋានអន្តរជាតិសៀមរាប មានប្រសាសន៍បន្ថែមទៀតថា ការពិភាក្សានៅកិច្ចប្រជុំនេះ គឺបានផ្តោតសំខាន់ទៅលើនីតិវិធីប្រតិបត្តិ ធានាការពារប្រកបដោយប្រសិទ្ធភាព ការឆ្លង-ការចម្លងជំងឺកូវីដ-១៩ ដោយឈរលើគោលការណ៍សម្រេចឯកភាពគ្នាកន្លងមក រវាងរដ្ឋមន្ត្រីទាំង២ ក្រសួងសុខាភិបាល និងក្រសួងទេសចរណ៍ ក្នុងនោះ គឺការត្រួតពិនិត្យយ៉ាងហ្មត់ចត់ ប័ណ្ណបញ្ជាក់ការចាក់វ៉ាក់សាំងពេញលេញ លិខិតបញ្ជាក់ការធ្វើតេស្ត PCR ៧២ម៉ោងមុនមកដល់គោលដៅ និងការធ្វើតេស្តរហ័សនៅពេលឆ្លងកាត់ព្រលានយន្តហោះ ស្របពេលដែលស្ថានភាពនៅកម្ពុជា អត្រាភាគរយខ្ពស់នៃការផ្តល់វ៉ាក់សាំងជូនប្រជាពលរដ្ឋ និង ការបើកប្រទេសឡើងវិញ អាចនិយាយបានថា កម្ពុជា គឺជាគោលដៅទេសចរណ៍សុវត្ថិភាព ហើយការដែលរាជរដ្ឋាភិបាលកម្ពុជា សម្រេចបើកទទួលស្វាគមន៍ភ្ញៀវទេសចរវ៉ាក់សាំងពេញលេញពីក្រៅប្រទេស អាចនិយាយបានថា នេះគឺជាការរង់ចាំរបស់ភ្ញៀវទេសចរអន្តរជាតិ ។
គួររំលឹកថា កាលរសៀលថ្ងៃទី១៧ ខែវិច្ឆិកា ឆ្នាំ២០២១កន្លងទៅនេះ ឯកឧត្តមសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល និងជាប្រធានគណៈកម្មការអន្តរក្រសួងដើម្បីប្រយុទ្ធនឹងជំងឺកូវីដ-១៩ រួមជាមួយឯកឧត្តមបណ្ឌិត ថោង ខុន រដ្ឋមន្ត្រីក្រសួងទេសចរណ៍ បានដឹកនាំក្រុមការងារបច្ចេកទេសរវាងក្រសួងសុខាភិបាល និងក្រសួងទេសចរណ៍ ដោយមានការចូលរួមពីមន្ទីរសុខាភិបាលនៃរដ្ឋបាលខេត្តសៀមរាប អញ្ជើញចុះពិនិត្យការរៀបចំទីតាំងដែលត្រូវអនុវត្តវិធានសុខាភិបាល ចំពោះអ្នកដំណើរដែលចូលប្រទេសកម្ពុជា តាមច្រកអាកាសយន្តដ្ឋានអន្តរជាតិខេត្តសៀមរាប ក្នុងការត្រៀមលក្ខណៈទទួលភ្ញៀវទេសចរអន្តរជាតិដែលបានចាក់វ៉ាក់សាំងការពារជំងឺកូវីដ-១៩ ពេញលេញចូលមកទស្សនាខេត្តសៀមរាប៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។