ខេត្តសៀមរាប ត្រៀមរៀបចំព្រឹត្តិការណ៍ចំនួន៣ នៅចុងឆ្នាំ២០២១នេះ
លោក ង៉ូវ សេងកាក់ ប្រធានមន្ទីរទេសចរណ៍ខេត្តសៀមរាប បានមានប្រសាសន៍កាលពីថ្មីៗនេះ ថា ក្រោយរាជរដ្ឋាភិបាលកម្ពុជាសម្រេចបើកប្រទេសឡើងវិញ និងទទួលយកភ្ញៀវទេសចរបរទេស ដែលទទួលបានការចាក់វ៉ាក់សាំងពេញលេញកាលពីពេលថ្មីៗនេះ រដ្ឋបាលខេត្តសៀមរាប បាននឹងកំពុងត្រៀមរៀបចំព្រឹត្តិការណ៍ចំនួន៣ នៅក្នុងខែធ្នូ នាឆ្នាំ២០២១នេះ ដើម្បីជំរុញទេសចរផ្ទៃក្នុង ហើយក៏ជាសញ្ញាបង្ហាញផងដែរថា ខេត្តទេសចរណ៍ដ៏ធំរបស់កម្ពុជាមួយនេះ បានត្រៀមខ្លួនរួចរាល់ ក្នុងការទទួលស្វាគមន៍ដំណើរទស្សនកិច្ចរបស់ភ្ញៀវជាតិ និងអន្តរជាតិ ក្នុងនោះរួមមាន ៖ ១. ព្រឹត្តិការណ៍អបអរទីក្រុងសៀមរាប ជាទីក្រុងវប្បធម៌អាស៊ាន , ២. ព្រឹត្តិការណ៍ប្រកួតវាយកូនហ្គោល សៀមរាបថ្មី២០២១ និង ៣. ព្រឹត្តិការណ៍រត់ប្រណាំងអន្តរជាតិពាក់កណ្ដាលម៉ារ៉ាតុងលើកទី២៦ ។
លោកប្រធានមន្ទីរ បន្ថែមថា តាមការណែនាំរបស់ឯកឧត្តម ទៀ សីហា អភិបាលខេត្តសៀមរាប ឯកឧត្តមបានជំរុញ និងលើកទឹកចិត្តដល់បណ្ដាមន្ទីរ អង្គភាព និងក្រុមហ៊ុនឯកជន ចូលរួមបង្កើតព្រឹត្តិការណ៍នានា ដើម្បីទាក់ទាញចំណាប់អារម្មណ៍ភ្ញៀវទេសចរ ខណៈដែលមានភ្នាក់ងារទេសចរណ៍ជិត៣០០ក្រុមហ៊ុនក្នុងខេត្តសៀមរាប បាននឹងកំពុងទាក់ទងជាមួយដៃគូរបស់ពួកគេនៅបរទេស ដើម្បីផ្សព្វផ្សាយពីកញ្ចប់ទេសចរណ៍ ក៏ដូចជាសិក្សាពីព័ត៌មានលម្អិតផ្សេងៗជុំវិញវិធានសុខាភិបាលចំពោះភ្ញៀវអន្តរជាតិ ដែលទទួលបានវ៉ាក់សាំងពេញលេញ ប៉ុន្តែការរៀបចំដំណើរទស្សនកិច្ចសម្រាប់ភ្ញៀវអន្តរជាតិមកកម្ពុជា ត្រូវការកិច្ចសហការទៅវិញទៅមកទាំងក្នុង និងក្រៅប្រទេស ព្រមទាំងត្រូវការពេលវេលាច្រើន។
លោក ង៉ូវ សេងកាក់ មានប្រសាសន៍បន្ថែមថា ទោះបីការរង់ចាំភ្ញៀវទេសចរពីក្រៅប្រទេសនៅមានឧបសគ្គខ្លះៗក៏ពិតមែន ប៉ុន្តែលោកនៅតែមានគំនិតវិជ្ជមានថា ទេសចរផ្ទៃក្នុង គឺជាផ្នែកមួយដ៏សំខាន់ ក្នុងការលើកកម្ពស់ចលនាទេសចរណ៍ក្នុងស្រុក ឱ្យមានសកម្មភាពឡើងវិញ ក្នុងនោះ ជនបរទេស ដែលកំពុងស្នាក់នៅក្នុងប្រទេសកម្ពុជា មានប្រមាណ ២០ម៉ឺននាក់ ក៏នឹងរួមចំណែកជួយជំរុញទេសចរណ៍ក្នុងស្រុកផងដែរ ដែលជាក់ស្ដែង នៅក្នុងថ្ងៃឈប់សម្រាកនៃព្រះរាជពិធីបុណ្យអុំទូក បណ្ដែតប្រទីប និងសំពះព្រះខែអកអំបុកកន្លងទៅនេះ ខេត្តសៀមរាបទទួលបានភ្ញៀវទេសចរប្រមាណ ១៤ម៉ឺននាក់ ដែលជួយឱ្យសេវាកម្មទេសចរណ៍មួយចំនួនក្នុងខេត្ត បានបើកដំណើរការឡើងវិញ ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។