ប្រឡងបាក់ឌុបឆ្នាំនេះ! មានបេក្ខជនជាង ១១ម៉ឺននាក់
ភ្នំពេញ៖ នៅតាមមណ្ឌលប្រឡងសញ្ញាបត្រមធ្យមសិក្សាទុតិយភូមិ(បាក់ឌុប) នៅក្នុងរាជធានីភ្នំពេញ និងបណ្តាខេត្តទូទាំងប្រទេសកម្ពុជា បានចាប់ផ្តើមហើយ នៅព្រឹកថ្ងៃចន្ទ ទី២៧ ខែធ្នូ ឆ្នាំ២០២១នេះ ដែលមានបន្ទប់ប្រឡងចំនួន ៤,៦១៦បន្ទប់ និង ២០៤មណ្ឌល់ និងមានបេក្ខជនសរុបចំនួន ១១៤ ១៨៣នាក់ (ស្រី ៦០ ៣៩៧នាក់)។ ក្នុងមួយបន្ទប់មាចំនួន ២៥នាក់។ ប្រឡងថ្ងៃទី១ រដ្ឋមន្ត្រីក្រសួងអប់រំ យុវជន និងកីឡា លោក ហង់ជួនណារ៉ុន បានទៅកាត់បើកកញ្ចប់វិញ្ញាសាប្រឡង នៅវិទ្យាល័យព្រះស៊ីសុវត្ថិ។
នៅមុនពេលបេក្ខជនចូលបន្ទប់ប្រឡង ក្រុមអនុរក្សបានឆែករកសំណៅឯកសារ និងឧបករណ៍អេឡិចត្រូនិកគ្រប់ប្រភេទមុនចូលក្នុងមណ្ឌលប្រឡង ពោលគឺ មិនខុសពីឆ្នាំមុនៗទេ ទោះស្ថិតក្នុងបរិបទកូវីដ-១៩ក៏ដោយ គ្រាន់តែរក្សាគម្លាត វាស់កម្តៅ ហើយប្រសិនបើបេក្ខជនលើសកម្តៅ ឬមានសញ្ញាកូវីដ-១៩ នៅតែប្រឡងជាធម្មតា នៅក្នុងបន្ទប់ដាច់ដោយឡែក។
ជាក់ស្តែងកីឡាករ ២រូប ដែលត្រឡប់មកពីប្រទេស កាហ្សាក់ស្តង់ ដែលរកឃើញកូវីដ-១៩ ត្រូវបានអនុញ្ញាតឱ្យប្រឡងជាធម្មតា ថ្ងៃ២៧-២៨ តែនៅក្នុងមណ្ឌលព្យាបាលកូវីដ-១៩៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។