លោក ម៉ូន ចេអ៊ីន ខិតខំស្វេងរកកិច្ចព្រមព្រៀងសន្តិភាពជាមួយកូរ៉េខាងត្បូង មុនពេលបញ្ចប់អាណត្តិ
កិច្ចព្រមព្រៀងសន្តិភាព គឺជាគោលដំបំណងធំបំផុតរបស់ប្រធានាធិបតីកូរ៉េខាងត្បូង ដើម្បីបញ្ចប់សង្គ្រាមឧបទ្វីបកូរ៉េ ដែលបានផ្ទុះឡើងកាលពីឆ្នាំ១៩៥០ និងបញ្ចប់ទៅនៅឆ្នាំ១៩៥៣ ដោយកិច្ចព្រមព្រៀងឈប់បាញ់។ ទាំងនោះហើយបានជាកូរ៉េទាំងពីរស្ថិតនៅក្នុងដំណាក់កាលនៃសង្គ្រាមនៅឡើយទេ។
ប្រធានាធិបតីកូរ៉េខាងត្បូង លោក មូន ចេអ៉ីន នៅថ្ងៃចន្ទនេះបានសន្យាថា នឹងប្រើប្រាសឱកាសចុងក្រោយនៅសល់ប៉ុន្មានខែទៀតនេះ ដើម្បីស្វែងរកកិច្ចព្រមព្រៀងសន្តិភាពជាមួយកូរ៉េខាងជើង បើទោះជាទីក្រុងព្យុងយ៉ាងបន្តមិនអើពើក៏ដោយ។
ការសន្យាខាងលើធ្វើឡើងនៅក្នុងសុន្ទរកថាឆ្នាំថ្មី ដែលត្រូវជាលើកចុងក្រោយរបស់លោក មូន ចែអ៉ីន មុននឹងអាណត្តិជាប្រធានាធិបតីកូរ៉េខាងត្បូងរយៈពេល ៥ឆ្នាំរបស់លោក ត្រូវបញ្ចប់នៅខែឧសភា ឆ្នាំ២០២២នេះ។ លោក មូន ថ្លែងនាឱកាសនោះថា «រដ្ឋាភិបាលនឹងបន្តរក្សាទំនាកទំនងអន្តរកូរ៉េជាប្រក្រតី និងមិនកែប្រែឡើយនូវជំហានឆ្ពោះទៅរកសន្តិភាព រហូតដល់ទីបញ្ចប់… ហើយក៏ខ្ញុំសង្ឃឹមថា កិច្ចខិតខំប្រឹងប្រែងសម្រាប់កិច្ចសន្ទនា នឹងនៅតែបន្តនៅក្រោមរដ្ឋបាលថ្មី»។
នៅក្នុងសុន្ទរកថាឆ្នាំថ្មីកាលពីប៉ុន្មានថ្ងៃកន្លងទៅនេះ, មេដឹកនាំកូរ៉េខាងជើង លោក គីម ជុងអ៊ុន មិនបានលើកឡើងពីការអំពាវនាវរបស់លោក មូន ចែអ៉ីន ក្នុងការស្វែងរកសន្តិភាពបិទបញ្ចប់សង្គ្រាមកូរ៉េ (ឆ្នាំ១៩៥០-១៩៥៣) ទាំងស្រុង ឬក៏ចេតនាចង់ចូលរួមក្នុងកិច្ចចរចានុយក្លេអ៊ែរជាថ្មីជាមួយសហរដ្ឋអាមេរិកនោះទេ។ មកទល់នឹងពេលនេះ ជាលក្ខណៈបច្ចេកទេស កូរ៉េខាងជើង និងកូរ៉េខាងត្បូង នៅតែបន្តស្ថិតនៅក្នុងស្ថានភាពសង្គ្រាមដដែល ដ្បិតសង្គ្រាមកូរ៉េបានបិទបញ្ចប់ទៅនៅក្រោម «បទឈប់បាញ់» មួយតែប៉ុណ្ណោះ ពោលគឺមិនមែនជាសន្ធិសញ្ញាសន្តិភាពឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។