ដកតំណែងមេប៉ុស្តិ៍សំរោងធំ ក្រោយជំរិតទារប្រាក់ពីយុវជនបីនាក់ចំនួន ៣៥០០ដុល្លារ ជាថ្នូរនឹងការដោះលែង
សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានសម្រេចដកហូតមុខតំណែង លោក ហួត សីហា ពីនាយប៉ុស្តិ៍នគរបាលរដ្ឋបាលសំរោងធំ នៃអធិការដ្ឋាននគរបាលស្រុកគៀនស្វាយ ព្រមទាំងបន្ថយឋានន្តរស័ក្តិ ពីវរសេនីយ៍ត្រីឱ្យមកត្រឹមអនុសេនីយ៍ឯកទៀតផង ក្រោយពីរកឃើញថា មេប៉ុស្តិ៍រូបនេះល្មើសនឹងវិន័យរបស់កងកម្លាំងនគរបាលជាតិ។
បើតាមសេចក្តីរាយការណ៍ កាលពីថ្ងៃទី៣០ ខែកក្កដា ឆ្នាំ២០២១ លោក ហួត សីហា មេប៉ុស្តិ៍សំរោងធំបានចាប់ខ្លួនយុវជន៣នាក់ ពាក់ព័ន្ធករណីគ្រឿងញៀន នៅចំណុចភូមិព្រែកតាកែវ ឃុំសំរោងធំ ស្រុកកៀនស្វាយ ខេត្តកណ្តាល ដោយបានជំរិតទារប្រាក់ពីយុវជនទាំងបីនាក់នោះចំនួន ៣៥០០ដុល្លារ ជាថ្នូរនឹងការដោះលែង។
ក្នុងករណីនេះ ក្រោយពីទទួលបានព័ត៌មាន លោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាល បានចាត់ឱ្យការិយាល័យបុគ្គលិកចុះស្រាវជ្រាវ។ បន្ទាប់ពីការិយាល័យបុគ្គលិក នៃស្នងការដ្ឋាននគរបាលខេត្តកណ្តាល ចុះស្រាវជ្រាវ និងសួរនាំបានឱ្យដឹងថា លោកវរសេនីយ៍ត្រី ហួត សីហា នាយប៉ុស្តិ៍នគរបាលរដ្ឋបាលសំរោងធំ នៃអធិការដ្ឋាននគរបាលស្រុកកៀនស្វាយ បានអនុវត្តខុសនីតិវិធី។
លោកវរសេនីយ៍ត្រី ហួត សីហា ត្រូវបានអនុវត្តវិន័យ និងសួរនាំបន្ថែម នៅការិយាល័យបុគ្គលិក រង់ចាំការសម្រេចពីគណៈស្នងការ និងធ្វើរបាយការណ៍សុំគោលការណ៍បន្ថែម ទៅថ្នាក់ជាតិដើម្បីពិនិត្យសម្រេច និងបានដកហូតមុខតំណែងពីនាយប៉ុស្តិ៍នគរបាលរដ្ឋបាលសំរោងធំ នៃអធិការដ្ឋាននគរបាលស្រុកកៀនស្វាយ ឱ្យមកជាមន្រ្តី និងបន្ថយឋានន្តរស័ក្កចំនួន ១ថ្នាក់ ឱ្យនៅត្រឹមថ្នាក់អនុសេនីយ៍ឯក ដោយមូលហេតុ ល្មើសវិន័យកងកម្លាំងនគរបាលជាតិ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។