រដ្ឋមន្ត្រីថៃ៧រូប ធ្វើពហិការចូលរួមកិច្ចប្រជុំគណៈរដ្ឋមន្ត្រី
នាយករដ្ឋមន្ត្រីថៃលោកប្រាយុទ្ធចាក់អូចា កំពុងប្រឈមនឹងបញ្ហាជាច្រើន ក្រោយមានរដ្ឋមន្ត្រីជាច្រើនរូបធ្វើពហិការចូលរួមកិច្ចប្រជុំ។
សារព័ត៌មានរ៉យទ័រនៅថ្ងៃទី ៨ខែកុម្ភៈបានផ្សាយថារដ្ឋមន្ត្រី ថៃចំនួន ៧រូបបានធ្វើពហិការចូលរួមកិច្ចប្រជុំរដ្ឋមន្ត្រីនៅថ្ងៃទី ៨ខែកុម្ភៈនេះ ។ ទាំងនោះបានបង្ហាញយ៉ាងច្បាស់ថា នាយករដ្ឋមន្ត្រីថៃ លោក ប្រាយុទ្ធ ចាន់អូចា បាន និងកំពុងប្រឈមមុខនឹងភាពស្មុគស្មាញសាជាថ្មី ហើយនេះត្រូវបានគេមើលឃើញថាជាសញ្ញាមួយបង្ហាញពីការបែកបាក់ផ្ទៃក្នុង នៃជួររដ្ឋាភិបាលចម្រុះមាន១៨គណបក្សចូលរួមដឹកនាំដោយលោក ប្រាយុទ្ធ
។
ការធ្វើពហិការរបស់ក្រុមរដ្ឋមន្ត្រី មកពីគណបក្ស Bhumjaithai Party ដែលជាគណបក្សធំទី២ នៅក្នុងរដ្ឋាភិបាលចម្រុះថៃ អាចនឹងក្លាយជារឿង ដ៏អាម៉ាស់មួយសម្រាប់លោក ប្រាយុទ្ធ ក្រោយគណបក្សរបស់លោក Palang Pracharat កាលពីសប្ដាហ៍មុន ទើបតែបានបណ្ដេញ សមាជិកសភារបស់ខ្លួន ២១រូប ចេញពីបក្ស ដោយចោទថាពួកគេបានបង្កការបែកបាក់សាមគ្គី។
ការធ្វើពហិការខាងលើ គឺជាការបង្ហាញការជំទាស់ទៅនឹងគម្រោងមួយរបស់រដ្ឋាភិបាលលោក ប្រាយុទ្ធ ដែលចង់ពន្យារសុពលភាពនៃការផ្ដល់ សម្បទានរយៈពេល ៣០ឆ្នាំ ដល់ក្រុមហ៊ុនសម្ព័ន្ធ BTS Group Holdings ក្នុងការធ្វើប្រតិបត្តិការប្រព័ន្ធផ្លូវដែក ក្នុងទីក្រុងបាងកក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។