អ៊ីរ៉ង់បង្ហាញកាំជ្រួចមីស៊ីល ទំនើប ក្នុងពេលកំពុងពិភាក្សាជាមួយអាមេរិក
បណ្តាញទូរទស្សន៍អ៊ីរ៉ង់ បានផ្សាយថា កាំជ្រួចមីស៊ីលថ្មីអាចវាយប្រហារគោលដៅក្នុងចម្ងាយ១៤៥០ គីឡូម៉ែត្រ។ រដ្ឋាភិបាលទីក្រុងតេអ៊ីរ៉ង់បានដាក់ឈ្មោះថា “Kheibarshekan” ជាភាសាដំបន់មាន អាវុធ Khaibar ជាការរំលឹកដល់វិមានរបស់ជនជាតិជ្វីហ្វ ដែលត្រូវក្រុមទាហានអ៊ីស្លាម កម្ទេច ក្នុងថ្ងៃដំបូងនៃការបង្កើតសាសនាអ៊ីស្លាម។
សារព័ត៌មាន Tasnim បានផ្សាយថា មីស៊ីល”Kheibarshekan” ត្រូវបានដាក់បង្ហាញ ក្នុងពេលប្រមុខដឹកនាំយោធាអ៊ីរ៉ង់ទស្សនកិច្ចទីតាំងកាំជ្រួចមីស៊ីល របស់កម្លាំងទាហានអ៊ីស្លាម IRGC នៅថ្ងៃទី ៩ខែកុម្ភៈ។
កាំជ្រួចមីស៊ីលខាងលើ គឺជាជំនាន់ទីបីផលិតដោយកម្លាំងទាហានអ៊ីរ៉ង់ អាចវាយប្រហារចាក់ទម្លុះរាល់ប្រព័ន្ធការពារមីស៊ីលនានារបស់សត្រូវ ។
នៅក្នុងព្រឹត្តិការណ៍មួយផ្សេងទៀត អ៉ីរ៉ង់ និងសហរដ្ឋអាមេរិកបានបន្តកិច្ចចរចាដោយប្រយោលនៅទីក្រុងវីយែននៅថ្ងៃទី៨ខែកុម្ភៈ ដើម្បីស្តារឡើងវិញនូវកិច្ចព្រមព្រៀងនុយក្លេអ៊ែរឆ្នាំ២០១៥ ដែលអតីតប្រធានាធិបតីអាមេរិកលោក ដូណាល់ ត្រាំ បានដកខ្លួនពីឆ្នាំ២០១៨។
ខណៈពេលដែលក្រសួងការបរទេសសហរដ្ឋអាមេរិកនិយាយថា ការចរចាកំពុងឈានចូលដល់ «ដំណាក់កាលចុងក្រោយ» មន្ត្រីអ៉ីរ៉ង់បានប្រកាសថា ផ្នែកនៃការទាមទាររបស់ពួកគេលើការដកទណ្ឌកម្មរហូតមកដល់ពេលនេះ មិនទាន់ត្រូវបានដោះស្រាយនៅក្នុងកិច្ចពិភាក្សានៅទីក្រុងវីយែននៅឡើយទេ។
ភាគីទាំងពីរនិយាយថា ពួកគេរង់ចាំការសម្រេចចិត្តចុងក្រោយផ្នែកនយោបាយពីភាគីម្ខាងទៀត ដើម្បីស្តារកិច្ចព្រមព្រៀងនុយក្លេអ៊ែរឡើងវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។