ក្រសួងទេសចរណ៍ ណែនាំ ៩​ចំណុច ដល់​មន្ទីរ​ទេសចរណ៍​រាជធានី​-​ខេត្ត ពង្រឹង​ការអនុវត្ត​វិធានការ​ទប់ស្កាត់​កូ​វីដ​១៩

​ភ្នំពេញ​៖ ក្រសួងទេសចរណ៍ កាលពី​ថ្ងៃទី ៩​ខែកុម្ភៈ ឆ្នាំ​២០២២ បានចេញ​សារាចរ​ណែនាំ ស្តីពី ការពង្រឹង​ការអនុវត្ត​វិធានការ​នានា​របស់​រាជ​រដ្ឋាភិបាល ក្រសួងសុខាភិបាល និង​វិធាន​សុវត្ថិភាព​ទេសចរណ៍ ដើម្បី​ប្រយុទ្ធ និង​ទប់ស្កាត់​ការឆ្លង​រាលដាល​នៃ​មេរោគ​កូ​វីដ​-១៩ ប្រភេទ​អូ​បី​ក្រុង (Omicron) ទៅដល់​មន្ទីរ​ទេសចរ​ណ៍​រាជធានី​-​ខេត្ត និង​ម្ចាស់ ឬ​អ្នកគ្រប់គ្រង​អាជីវកម្ម​ទេសចរណ៍​ទាំងអស់​នៅ​ទូទាំងប្រទេស​។​

​ក្រសួងទេសចរណ៍ បញ្ជាក់ថា ដើម្បី​ចៀសវាង​បាន​នូវ​មហន្តរាយ​សុខភាព​សាធារណៈ ផលប៉ះពាល់​សេដ្ឋកិច្ច គ្រួសារ និង​សេដ្ឋកិច្ចសង្គម រួមទាំង​ជៀសវាង​បាន​នូវ​ការវិលត្រឡប់​ទៅរក​ផល​លំបាក​នៃ​ការរស់នៅ​ប្រចាំថ្ងៃ និង​ដើម្បី​ធានាបាន​នូវ​និរន្តរភាព​នៃ​ការរស់នៅ​តាម​គន្លង​ប្រក្រតីភាព​ថ្មី​បានយូរ​អង្វែង ក្រសួងទេសចរណ៍ សូម​ក្រើនរំលឹក ដល់​មន្ទីរ​ទេសចរណ៍​រាជធានី ខេត្ត និង​ម្ចាស់ ឬ​អ្នកគ្រប់គ្រង​អាជីវកម្ម ទេសចរណ៍ ទាំងអស់​អំពី​ការពង្រឹង​ការអនុវត្ត វិធានការ​នានា​របស់​រាជរដ្ឋាភិបាល ក្រសួងសុខាភិបាល និង​វិធាន​សុវត្ថិភាព​ទេសចរណ៍ (​ឬ​នីតិវិធី​ប្រតិបត្តិ​ស្តង់ដា អប្បបរមា​-SOP) ដែល​ក្នុងនោះ រួមមាន​៖

១)- ត្រូវ​ពង្រឹង​ការអនុវត្ត​ឱ្យបាន​យ៉ាង​ខ្ជាប់​ខ្លួន និង​ម៉ឺងម៉ាត់​នូវ​វិធានការ​ទាំងឡាយ ដែល​បាន​ដាក់ចេញ ដោយ​ក្រសួងសុខាភិបាល និង​វិធាន​សុវត្ថិភាព​ទេសចរណ៍​របស់​ក្រសួងទេសចរណ៍​ទប់ស្កាត់​ការ រីក​រាលដាល​ជំងឺ​កូ​វីដ ១៩ ពិសេស​វិធានការ ៣​ការពារ និង ៣​កុំ​។ គ្រប់​មូលដ្ឋាន​អាជីវកម្ម ត្រូវ​កត់ត្រា​អត្តសញ្ញាណ (​ជាពិសេស​អាសយដ្ឋាន​និង​លេខ​ទូរស័ព្ទ​ទំនាក់ទំនង​) ភ្ញៀវទេសចរ​ទាំងអស់​។ និង​ត្រូវ​ចុះឈ្មោះ​បង្កើត និង​ប្រើប្រាស់​ប្រព័ន្ធ QR Code “​ទប់ស្កាត់​កូ​វីដ​-១៩” (Stop COVID) និង​តម្រូវឱ្យ​ភ្ញៀវទេសចរ​ត្រូវតែ​ស្កេ​ន​ជាដាច់ខាត​មុន​ចូលទៅក្នុង​កន្លែង​របស់​ខ្លួន​។ ទន្ទឹមនឹងនេះ ត្រូវ​រៀបចំ​ការត្រួតពិនិត្យ​កំដៅ ការបាញ់​អាល់កុល​សម្លាប់​មេរោគ និង​តម្រូវឱ្យ​ភ្ញៀវទេសចរ​ត្រូវ​ពាក់​ម៉ាស់ (​លើកលែង​ពេល​ពិសា​អាហារ និង​ភេសជ្ជៈ និង​រក្សា​គម្លាត​សុវត្ថិភាព​ស្របតាម​គោលការណ៍​សុខាភិបាល​។​

២)- គ្រប់​មូលដ្ឋាន​អាជីវកម្ម សេវាកម្ម​ទេសចរណ៍ ត្រូវ​ពង្រឹង​ការគ្រប់គ្រង​ឱ្យបាន​ល្អប្រសើរ ពិសេស​ត្រូវ កំណត់​សមត្ថភាព​ផ្ទុក (Carrying Capacity) អតិបរមា ដោយ​ប្រើប្រាស់​ប្រព័ន្ធគ្រប់គ្រង​សមត្ថភាព​ផ្ទុក (Carrying Capacity Management System) ដែល​រៀបចំ​ដោយ​ក្រសួងទេសចរណ៍ តាមរយះ គេហទំព័រ http://www.cinccms.org​។​

៣)- គ្រប់​មូលដ្ឋាន​អាជីវកម្ម​សេវាកម្ម​ទេសចរណ៍ មិនត្រូវ​រៀបចំ​ឱ្យមាន​ការជួបជុំ​ផឹកស៊ី កម្សាន្ត​សប្បាយ ប្រាសចាក​ពី​ការណែនាំ​របស់​ក្រសួងសុខាភិបាល​ជាដាច់ខាត​។ ចំពោះ​ការជួបជុំ​ជា​ក្រុម​តូច​ដែល​ចាំបាច់ (​លក្ខណៈ​ជា​ក្រុមគ្រួសារ​ផ្ទាល់​) នៅក្នុង​ភោជនីយដ្ឋាន អាហា​រដ្ឋា​ន​ទេសចរណ៍ ចាំបាច់​ត្រូវតែ​រក្សា​គម្លាត​សុវត្ថិភាព​បុគ្គល​ឱ្យបាន​យ៉ាងតិច ១,៥០​ម៉ែត្រ (​មួយ​ម៉ែត្រ​ហាសិប​សង់ទីម៉ែត្រ​) និង​មាន​ចំនួន​កម្រិត​អាស្រ័យ​តាម​ការកំណត់​ដោយឡែក​របស់​រដ្ឋបាល​រាជធានី ខេត្ត​។​

៥)- គ្រប់​មូលដ្ឋាន​អាជីវកម្ម សេវាកម្ម​ទេសចរណ៍ ត្រូវ​ធានាថា គ្រប់​បុគ្គលិក​បម្រើការ​បាន​ចាក់​វ៉ាក់សាំង កូ​វីដ​-១៩ ទាំង​ដូ​ស​មូលដ្ឋាន និង​ដួស​ជំរុញ ស្របតាម​ការកំណត់រ​បស់​ក្រសួងសុខាភិបាល​។​

៥)-​ព្រម​ជាមួយនិង​វិធានការ​ទប់ស្កាត់​ការរីក​រាលដាល​ជំងឺ​កូ​វី​៥-១៩ គ្រប់​មូលដ្ឋាន​អាជីវកម្ម​សវាក​ម្ម ទេសចរណ៍ ត្រូវ​ពង្រឹងគុណភាព​សេវាកម្ម ថែរក្សា​បរិស្ថាន​-​អនាម័យ និង​រក្សា​តម្លៃ​ផលិតផល និង​សេវាកម្ម​ឱ្យបាន​សមរម្យ​។​

៦)- មន្ទីរ​ទេសចរណ៍​រាជធានី ខេត្ត ត្រូវ​សហការ​ជាមួយ​រដ្ឋបាល​រាជធានី​-​ខេត្ត និង​អាជ្ញាធរ​មូលដ្ឋាន ដើម្បី​ពិនិត្យ និង​ពង្រឹង​បន្ថែម​នូវ​ការអនុវត្ត​វិធាន​សុវត្ថិភាព​ទេសចរណ៍ (​ឬ​នីតិវិធី​ប្រតិបត្តិ​ស្តង់ដា​អប្បបរមា​-SOP) និង​រាល់​វិធានការ​នានា​ជា​ធរមាន​ចំពោះ​អាជីវកម្ម​សេវាកម្ម​ទេសចរ ណ៍ ដែល​បានអនុញ្ញាត​ឱ្យមាន​ប្រតិបត្តិការ​ដោយ​រដ្ឋបាល​រាជធានី ខេត្ត និង​អាជ្ញាធរ​មូលដ្ឋាន​ឱ្យបាន​ជាប់​ជាប្រចាំ​។​

៧)- មន្ទីរ​ទេសចរណ៍​រាជធានី ខេត្ត ត្រូវ​សហការ​ជាមួយ​រដ្ឋបាល​រាជធានី ខេត្ត និង​អាជ្ញាធរ​មូលដ្ឋាន ណែនាំ​បន្ត​ដល់​គ្រប់​មូលដ្ឋាន​អាជីវកម្ម​សេវាកម្ម​ទេសចរណ៍ ត្រូវ​តាមដាន​ត្រួតពិនិត្យ​រាល់​បុគ្គលិក​របស់ខ្លួន ដែល​កំពុង​ជាប់​កាតព្វកិច្ច​ធ្វើ​ច​ត្តា​ឡី​ស័ក និង​តម្រូវឱ្យ​អ្នកគ្រប់គ្រង​មូលដ្ឋាន​អាជីវកម្ម ត្រូវ​ជូនដំណឹង​មក​អាជ្ញាធរ​មូលដ្ឋាន​នូវ​រាល់​ករណី​សង្ស័យ ចំពោះ​ភ្ញៀវ​ដែល​ជាប់​ពាក់ព័ន្ធ​នឹង​ជំងឺ​កូ​វីដ​-១៩ បន្ទាប់ពី​ស្កេ​ន QR Code “​ទប់ស្កាត់​កូ​វីដ​-១៩”)​។​

៨)- គ្រប់​មូលដ្ឋាន​អាជីវកម្ម ត្រូវអនុវត្ត​រាល់​វិធានការ​ជា​ធរមាន ករណី​ខកខាន​មិនបាន​អនុវត្ត ឬ​អនុវត្ត មិនបាន​ត្រឹមត្រូវ មន្ទីរ​ទេសចរណ៍​រាជធានី ខេត្ត ត្រូវ​ស្នើសុំ​ការសហការ​ពី​អាជ្ញាធរ​មូលដ្ឋាន​បញ្ឈប់​ប្រតិបត្តិការ​អាជីវកម្ម​នោះ​ជាដាច់ខាត និង​បន្ត​នីតិវិធី​ស្នើសុំ​ការអនុវត្ត​វិធានការ​ច្បាប់​ជា​ធរមាន ពិសេស​ច្បាប់​ស្តីពី​វិធានការ​ទប់ស្កាត់​ការឆ្លង​រាលដាល​នៃ​ជំងឺ​កូ​វីដ​-១៩ និង​ជំងឺ​កាច​សាហាវ និង​ប្រកបដោយ​គ្រោះថ្នាក់​ធ្ងន់ធ្ងរ​ផ្សេងទៀត​។​

៩)- មន្ទីរ​ទេសចរណ៍​រាជធានី ខេត្ត ត្រូវ​សហការ​ជាមួយ​រដ្ឋបាល​រាជធានី ខេត្ត និង​អាជ្ញាធរ​មូលដ្ឋាន ចុះ ពិនិត្យ​ទីតាំង​ដែល​ជាប់​បំរាម​ហាមឃាត់​មិនឱ្យ​ប្រកប​អាជីវកម្ម ចៀសវាង​លប​ល្អ​ប​ប្រកប​អាជីវកម្ម ដោយ​ពុំបាន​សុំច្បាប់​អនុញ្ញាត​៕​

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

Close