កម្មករធ្វើផ្លូវជុំវិញផ្សារចាស់ ស្នើសុំអន្តរាគមន៍ក្រោយមេកាអត់បើកលុយឲ្យ
ក្រុមកម្មករធ្វើផ្លូវ៥ខ្សែ នៅជុំវិញផ្សារចាស់ ក្នុងចំណោមគម្រោង សាងសង់ ផ្លូវ៣៨ខ្សែ ក្នុងក្រុងសៀមរាប បាននាំគ្នាតវ៉ាកាលពីថ្ងៃទី១២ កុម្ភៈ ក្រោយពីមេការរបស់ពួកគេ ឈ្មោះ សេង ពេជ្រ មិនបានបើកប្រាក់ឲ្យពួកគេអស់រយៈពេលជាច្រើនខែមកហើយ។
បើតាមការលើកឡើងរបស់ក្រុមកម្មករថា ពួកគេមានគ្នាជិត៣០នាក់ ទទួលបន្ទុកធ្វើផ្លូវ៥ខ្សែ នៅជុំវិញផ្សារចាស់ ក្នុងភូមិមណ្ឌុល១ សង្កាត់ស្វាយដង្គុំ ក្រុងសៀមរាប, កន្លងមកឈ្មោះ សេង ពេជ្រ ជាមេការ មិនដែលបើកប្រាក់ខែឲ្យពួកគេនោះ។ ប៉ុន្តែមេការរូបនេះតែងអោយកម្មករខ្ចីលុយ ដោយអ្នកខ្លះខ្ចីបាន៤០មុឺនរៀល ៦០មុឺន ១លានរៀល តាមតែចិត្តដែលគេឲ្យខ្ចី។ ប៉ុន្តែឥលូវនេះផ្លូវត្រូវធ្វើរួចរាល់ហើយ ប៉ុន្តែឈ្មោះ សេង ពេជ្រ មិនបើកលុយឲ្យពួកគេនោះទេ ដោយថា ខាងក្រុមហ៊ុន មិនទម្លាក់លុយឲ្យ។
នៅក្នុងខែកុម្ភៈនេះដែរ ក្រុមកម្មករក៏បានទៅសួរនាំក្រុមហ៊ុនដោយសុំបើកប្រាក់ខែ តែខាងក្រុមហ៊ុនឆ្លើយថា ខាងក្រុមហ៊ុនបានទម្លាក់លុយអោយលោក សេង ពេជ្រ អស់ហើយ។
ក្រុមកម្មករទាំងនោះបានបញ្ជាក់ថា ពួកគេខ្លះបានបាត់ប្រាក់ខែ ៣ខែ ខ្លះ៥ខែ ហើយ ដោយក្នុង១ខែចន្លោះពី៣០០$ ទៅ៥០០$។
ចំពោះករណីនេះ យើងមិនអាចស្វែងរកការបំភ្លឺពីឈ្មោះ សេង ពេជ្រ មេកាសាងសង់ផ្លូវដែលរងការចោទប្រកាន់នោះបាននៅឡើយទេ។
សូមបញ្ជាក់ថា គម្រោងស្ថាបនាហេដ្ឋារចនាសម្ព័ន្ធផ្លូវចំនួន ៣៨ខ្សែ នៅក្រុងសៀមរាប បានបញ្ចប់ការស្ថាបនាជាស្ថាពរតាំងពីថ្ងៃទី២៩ ខែធ្នូ ឆ្នាំ២០២១ និងគ្រោងសម្ភោធដាក់ឱ្យប្រើប្រាស់ជាផ្លូវការក្នុងពេលឆាប់ៗ ខាងមុខនេះ។
គម្រោងកែលម្អហេដ្ឋារចនាសម្ព័ន្ធផ្លូវក្នុងក្រុងសៀមរាប ចំនួន៣៨ខ្សែ នេះ មានប្រវែងសរុប ១០៦,៤២ គីឡូម៉ែត្រ ប្រើប្រាស់ថវិកាជាតិសរុបប្រមាណជាង ១៤៩ ២១៦ ៥៩៥ ដុល្លារអាមេរិក ដោយក្នុងនោះចំនួន៩លានដុល្លារអាមេរិក ចំណាយលើការងារចាំបាច់ក្នុងការរៀបចំ ស្ថាបនាប្រព័ន្ធបង្ហូរទឹកភ្លៀង និងទឹកកខ្វក់ ឋិតក្រៅគម្រោងសាងសង់ខ្សែផ្លូវទាំង៣៨នេះ ចំណាយ ពេលសាងសង់ចំនួន១៣ខែ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។