ខ្លាចរុស្ស៊ីវាយប្រហារ អាមេរិកបញ្ជូនប្រព័ន្ធមីស៊ីលការពារដែនអាកាស Patriot ទៅកាន់ប្រទេសប៉ូឡូញ
អាមេរិកបានដាក់ពង្រាយប្រព័ន្ធមីស៊ីលការពារដែនអាកាស Patriot ទៅកាន់ប្រទេសប៉ូឡូញ ដើម្បីជួយបង្កើនសកម្មភាពការពារ ចំពោះការគំរាមកំហែងក្នុងពេលរុស្ស៊ី កំពុងតែបើការវាយប្រហារអ៊ុយក្រែន។
សារព័ត៌មាន CNN បានដកស្រង់សំដី លោក Adam Miller អ្នកនាំពាក្យទីបញ្ជាការ EUCOM ប្រចាំនៅតំបន់អឺរ៉ុបបានលើកឡើងកាលពីថ្ងៃទី ៨ខែមីនាថា «ក្រោមការបញ្ជាររបស់ក្រសួងការពារជាតិអាមេរិក និងតបតាមសំណើររបស់ប្រទេសប៉ូឡូញ អគ្គមេបញ្ជាការកម្លាំងទាហានអាមេរិកប្រចាំនៅក្នុងតំបន់អឺរ៉ុប EUCOM បានសម្រេចដាក់ពង្រាយប្រព័ន្ធកាំជ្រួចមីស៊ីលការពារ Patriot ទៅកាន់ប្រទេសប៉ូឡូញ។
ប្រព័ន្ធមីស៊ីលខាងលើ គឺអាចវាយស្ទាក់កាំជ្រួចមីស៊ីលរយៈចម្ងាយខ្លី កាំជ្រួចមីស៊ីលអន្តរទ្វីប ក៏ដូចជាយន្តហោះចម្បាំងទំនើបៗរបស់សត្រូវ។ ការដាក់ប្រព័ន្ធមីស៊ីល គឺជាការធានារបស់អាមេរិកទៅតាម ធម្មនុញ្ញ មាត្រាទី៥ របស់ណាតូ ។ នៅក្នុងមាត្រាទី៥ បានបញ្ជាក់ថា រាល់ការវាយប្រហារទៅលើប្រទេសណាមួយជាសមាជិកមានន័យថាគឺវាយប្រហារទៅលើអង្កការណាតូទាំងមូល។
សកម្មភាពខាងលើបានបង្កក្តីបារម្ភយ៉ាងខ្លាំងពី សង្គ្រាមនៅក្នុងប្រទេសអ៊ុយក្រែនកាន់តែតានតឹងខ្លាំងឡើង ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។