ឈ្លោះប្រកែកប្តីប្រពន្ធ រេចង្កូតរថយន្តធ្លាក់ចូលរណ្តៅដីលង់ទឹកស្លាប់នៅសង្កាត់ស្រង៉ែ ក្រុងសៀមរាប
បើតាមសេចក្តីរាយការណ៍បានឲ្យដឹងថា កាលពីវេលាម៉ោងប្រមាណ១២ថ្ងៃត្រង់ ថ្ងៃទី១៦ ខែមីនា ឆ្នាំ២០២២នេះ នៅចំណុចរណ្ដៅដី អេង សុខហ្គិច ស្ថិតក្នុងភូមិតាចក សង្កាត់ស្រង៉ែ ក្រុងសៀមរាប មានករណីរថយន្តមួយគ្រឿងធ្លាក់ចូលរណ្តៅដី បណ្តាលឲ្យបុរសជាប្តីលង់ទឹកស្លាប់។
ជនរងគ្រោះត្រូវគេបញ្ជាក់ថា មានឈ្មោះ ស៊ុយ ស៊ីហ៊ិញ ភេទប្រុស អាយុ៤១ ឆ្នាំ មុខរបបរបើកឡានដឹកដី រស់នៅភូមិថ្នល់ សង្កាត់ស្រង៉ែ ក្រុងសៀមរាប ខេត្តសៀមរាប ដោយឡែកអ្នករួមដំណើរជាមួយត្រូវជាប្រពន្ធបានរងរបួសស្រាលឈ្មោះ ភុន ផល្លា ភេទស្រី អាយុ៣៧ឆ្នាំ មុខរបរអ៊ុតសក់ រស់នៅភូមិថ្នល់ សង្កាត់ស្រង៉ែ ក្រុងសៀមរាប ខេត្តសៀមរាប។
តាមអ្នកដឹងហេតុការណ៍នេះ បានបញ្ជាក់ថា មូលហេតុដំបូង គឺដោយសារតែជនរងគ្រោះជាប្តី បានឈ្លោះប្រកែកគ្នាជាមួយប្រពន្ធពេលកំពុងបើកឡាន ពេលនោះក៏រេចង្កូតបណ្តាលឲ្យធ្លាក់ចូលក្នុងរណ្តៅដីដែលមានទឹកពេញតែម្តង។
ក្រោយពីឡានធ្លាក់ចូលក្នុងរណ្តៅដីនោះ បុរសជាប្តីបានខំទាញប្រពន្ធចេញពីក្នុងទឹក ហើយខ្លួនឯងក៏ផុតដៃផុតជើងលង់ទឹកស្លាប់តែម្តងទៅ។
បច្ចុប្បន្នសពត្រូវសមត្ថកិច្ចប្រគល់អោយក្រុមគ្រួសារយកទៅធ្វើបុណ្យតាមប្រពៃណី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។