ក្រុម BURN X FLASH ឈ្នះជើងឯកកីឡាអេឡិចត្រូនិកពានរង្វាន់ T.Y E-Champion 2022
នៅទីបំផុត ក្រុម BURN X FLASH បានក្លាយជាម្ចាស់ជើងឯក ពានរង្វាន់កីឡាអេឡិចត្រូនិក ពានរង្វាន់ T.Y E-Champion 2022 រដូវកាលទី១ បន្ទាប់ពីបានយកឈ្នះនៅវគ្គផ្តាច់ព្រ័ត្រ កាលពីថ្ងៃទី៣ ខែមេសា ឆ្នាំ២០២២ នៅសាលផ្សារទំនើបអ៊ីអនសែនសុខ រាជធានីភ្នំពេញ។ ព្រឹត្តិការណ៍កីឡាអេឡិចត្រូនិក ពានរង្វាន់ T.Y E-Champion 2022 នេះបានដំណើរការពីថ្ងៃទី១០ ខែកុម្ភៈ ដល់ថ្ងៃទី៣ ខែមេសា ឆ្នាំ២០២២ ដោយមានក្រុមចូលរួមដំបូងរហូតដល់ ២៥៦ក្រុម និងមានកីឡាករ ១២៨០នាក់ និងគ្រូបង្វឹក ២៥៦នាក់ ដោយប្រកួតលើវិញ្ញាសា Mobile Legend Bang Bang។
ឆ្លងកាត់ការប្រកួតជាច្រើនដំណាក់កាលយ៉ាងស្វិតស្វាញជាបន្តបន្ទាប់ ចុងក្រោយលទ្ធផលទទួលបានរួមមាន៖ ចំណាត់ថ្នាក់លេខ៧-៨ បានទៅលើក្រុម Darkside និង ក្រុម Dead or Alive, ចំណាត់ថ្នាក់លេខ៥-៦ ក្រុម Infamous Legends និង ក្រុម Team Max, ចំណាត់ថ្នាក់លេខ៤ ក្រុម DG Quantum, ចំណាត់ថ្នាក់លេខ៣ ក្រុម Impunity KH, ចំណាត់ថ្នាក់លេខ២ ក្រុម SEE YOU SOON, ចំណាត់ថ្នាក់លេខ១ ក្រុម BURN X FLASH។ សម្រាប់ប្រាក់រង្វាន់ជ័យលាភីមានរហូតដល់ ១០០លានរៀល ក្នុងនោះចំណាត់ថ្នាក់លេខ១ ទឹកប្រាក់ ៥០លានរៀល, លេខ២ ទឹកប្រាក់ ២៥លានរៀល, លេខ៣ ទឹកប្រាក់ ១៥លានរៀល, លេខ៤ ទឹកប្រាក់ ៤លានរៀល។ លើសពីនេះទៅទៀតក៏មានប្រាក់រង្វាន់លើកទឹកចិត្តសម្រាប់៤ក្រុមដែលមិនបានទៅវគ្គបន្ត ដោយក្នុង១ក្រុមទទួលបានប្រាក់រង្វាន់ ១លាន៥សែនរៀល។
លោក លន់ សាមឌី អគ្គលេខាធិការ សហព័ន្ធកីឡារអេឡិចត្រូនិកកម្ពុជាបានចាត់ទុកថា ពានរង្វាន់ T.Y Media E-Champion រដូវកាលទី១នេះគឺជាព្រឹត្តិការណ៍ដ៏ធំមួយ ក្នុងការជួយជំរុញការអភិវឌ្ឍគុណភាពសមត្ថភាពកីឡាករកាន់តែរីកចម្រើនបន្ថែមទៀត ពីព្រោះថាប្រភេទកីឡាអេឡិចត្រូនិកមានបេសកកម្មធំៗចំនួនពីរចំពោះមុខ គឺត្រៀមចូលរួមប្រកួតកីឡា ស៊ីហ្គេម លើកទី៣២ នៅប្រទេសវៀតណាម នាខែឧសភា ឆ្នាំ២០២២ និងត្រៀមឆ្ពោះទៅទទួលរៀបចំធ្វើជាម្ចាស់ផ្ទះ កីឡាស៊ីហ្គេម លើកទី៣២ ឆ្នាំ២០២៣ នៅកម្ពុជា និងព្រឹត្តិការណ៍អន្តរជាតិផ្សេងៗទៀត។
លោក ឈុន សំណាង អគ្គនាយកក្រុមហ៊ុនធី វ៉ាយ មេឌា & អ៊ែតវើថាយស៊ីងគូសបញ្ជាក់ថា ការប្រកួតនេះនឹងរួមចំណែកអភិវឌ្ឍឲ្យកាន់តែរឹងមាំក្នុងបច្ចេកទេសរបស់កីឡាករ ជាពិសេសក្រុមជម្រើសជាតិ ក្នុងការត្រៀមខ្លួនចូលរួមប្រកួតកីឡាស៊ីហ្គេម លើកទី៣១ នាខែឧសភា ឆ្នាំ២០២២ នៅប្រទេសវៀតណាម។
លោកអគ្គនាយកបន្ថែមថា សម្រាប់ការរៀបចំឆាកប្រកួតគឺមានលក្ខណៈធំស្តង់ដារមួយ ហើយពេលក្រុមជម្រើសជាតិឡើងប្រកួតលើឆាកធំយ៉ាងណា ក៏មិនមានអារម្មណ៍ភិតភ័យដែរ ដោយផ្តោតអារម្មណ៍តែលើការប្រកួតប៉ុណ្ណោះ។ ដូច្នេះលោកជឿថា ក្រុមកម្ពុជានឹងអាចប្រកួតប្រជែងអស់ពីសមត្ថភាព និងដណ្តើមបានលទ្ធផលល្អប្រសើរជាក់ជាមិនខាន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។