កម្ពុជា ឈរលេខ២ ការប្រកួតកីឡាម៉ូតូទឹកអន្តរជាតិ នៅខេត្តព្រះសីហនុ
ព្រឹត្តការណ៍ប្រកួតកីឡាម៉ូតូទឹកកម្រិតអន្តរជាតិ ឆ្នាំ២០២២ ដែលកម្ពុជាជ្រើសរើសយកខេត្តព្រះសីហនុ ធ្វើជាម្ចាស់ផ្ទះបានបញ្ចប់ដោយជោគជ័យ ក្នុងនោះអត្តពលិកកីឡាម៉ូតូទឹកថៃ ឈរលេខ១ ខណៈកម្ពុជា ឈរលេខ២ ក្នុងចំណោមអត្តពលិកជាង៦០នាក់ មកពី៤ប្រទេស។
ឯកឧត្តម ណុះ ស្លេះ ប្រធានសហព័ន្ធកីឡាម៉ូតូទឹកកម្ពុជាបានឲ្យដឹងថា ព្រឹត្តការណ៍ប្រកួតកីឡាម៉ូតូទឹកកម្រិតអន្តរជាតិនេះ មានកីឡាករល្បីៗកម្រិតអន្តរជាតិ និងពិភពលោកចូលរួមប្រកួត ខណៈកម្ពុជាបានដាក់៧វិញ្ញាសាឲ្យប្រកួតប្រជែង ជាមួយនិងប្រាក់រង្វាន់សរុប៣ម៉ឺនដុល្លាសហរដ្ឋអាមេរិក។
ជាលទ្ធផល ថៃឈរលេខ១ ដណ្តើមមេដាយសរុប ១២គ្រឿង មាស៤ ប្រាក់៣ និងសំរឹទ្ធ៥គ្រឿង លេខ២ ម្ចាស់ផ្ទះកម្ពុជា ដណ្តើមបានមេដាយសរុប ៨គ្រឿង មាស៣ ប្រាក់៣ និងសំរិទ្ធ២គ្រឿង និងម៉ាឡេស៊ី លេខ៣ ដណ្តើមបានមេដាយប្រាក់១គ្រឿង។
ឯកឧត្តម សុខ គាង រដ្ឋលេខាធិការតំណាងឯកឧត្តម សាយ សំអាល់ រដ្ឋមន្ត្រីក្រសួងបរិស្ថាន បានកោតសរសើរចំពោះគណៈកម្មការបច្ចេកទេសទាំងអស់ ដែលបានប្រឹងប្រែង ប្រើប្រាស់ចំណេះដឹងបទពិសោធ សមត្ថភាពកាត់សេចក្តីការប្រកួត ដោយអនុវត្តតាមគោលការណ៍បច្ចេកទេសប្រកបដោយវិជ្ជាជីវៈ ផ្តល់យុត្តិធម៌ និងតម្លាភាពដល់កីឡាករ នឹងបានរកឃើញនូវកីឡាករឆ្នើមដែលទទួលបានជ័យលាភី នៃការប្រកួតម៉ូតូទឹកនាពេលនេះ។
ឯកឧត្តមរដ្ឋលេខាធិការ សង្ឃឹមថា តាមរយៈការប្រកួតនេះនឹងធ្វើអត្តពលិកកម្ពុជា និងមន្ត្រីរៀបចំការប្រកួត កាន់តែរីកចម្រើន ទាំងសមត្ថភាព សិទ្ធផល ត្រៀមដណ្តើមមេដាយមាសជូនកម្ពុជា ក្នុងព្រឹត្តការណ៍កីឡាស៊ីហ្គេម លើកទី៣២ នាឆ្នាំ២០២៣ ដែលកម្ពុជាធ្វើជាម្ចាស់ផ្ទះជាប្រវត្តិសាស្ត្រលើកដំបូងឲ្យទទួលបានជោគជ័យ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។