ក្រុមតេងឡាយ ឈ្នះជើងឯក ពានរង្វាន់សមាគមកីឡាប៉េតង់វ័យចាស់ ឆ្នាំ២០២២
សមាគមកីឡាប៉េតង់វ័យចាស់បានរៀបចំការប្រកួតកីឡាប៉េតង់ រយៈពេល១ថ្ងៃពេញ កាលពីថ្ងៃទី១១ ខែមិថុនា ឆ្នាំ២០២២ នៅក្នុងបរិវេណ កសិដ្ឋាន អមរៈ ខេត្តកណ្តាល ដោយក្រុមតេងឡាយឈ្នះពានរង្វាន់ធំ ខណៈ ក្រុមបុរសពិតឈ្នះពានសមាគម។
បន្ទាប់ពីដំណើរការប្រកួតយ៉ាងស្វិតស្វាញពេញមួយថ្ងៃ គណៈកម្មការបច្ចេកទេសបានរកឃើញម្ចាស់ជ័យលាភី រួមមាន ផ្នែកពានធំ ចំណាត់ថ្នាក់លេខ១ បានទៅលើក្រុមតេងឡាយ, លេខ២ ក្រុមអូឡាំពិក ខណៈចំណាត់ថ្នាក់លេខ៣-លេខ៣ស្ទួន បានទៅលើក្រុមកសិដ្ឋានអមរៈ និងក្រុមព្រែកហូរ។ ផ្នែកពានសមាគម ចំណាត់ថ្នាក់លេខ១ ក្រុមបុរសពិត, លេខ២ ក្រុមកូនខ្មែរ ខណៈក្រុមលេខ៣-លេខ៣ស្ទួន ក្រុម DTA 1 និងក្រុម DTA 2។
លោក ស៊ុម សុជាតិ អនុប្រធានសហព័ន្ធកីឡាប៊ូល និងប៉េតង់កម្ពុជាគូសបញ្ជាក់ថា ការរៀបចំការប្រកួតនេះ ក៏ដើម្បីបង្កើនសមត្ថភាពកីឡារវ័យចាស់កម្ពុជា ដើម្បីត្រៀមចូលរួមប្រកួតប្រជែងកីឡាប៉េតង់វ័យចាស់ ជាលក្ខណៈជាតិ និងអន្តរជាតិ នៅប្រទេសក្នុងអាស៊ីអាគ្នេយ៍ផងដែរ ពីព្រោះកន្លងមកនេះ ប៉េតង់វ័យចាស់កម្ពុជាធ្លាប់បានចូលរួមប្រកួតនៅប្រទេសនានាជាបន្តបន្ទាប់ផងដែរ។
លោក ថន វណ្ណារ៉ា ប្រធានសមាគមប៊ូល និងប៉េតង់ខណ្ឌទួលគោក និងជាអនុប្រធានភូមិបាលសូរិយោដីខណ្ឌទួលគោក ដែលជាអ្នករៀបចំព្រឹត្តិការណ៍នេះបានបង្ហាញគោលបំណងនៃការប្រកួតនេះថា នេះជាការការប្រមូលផ្តុំកីឡាករប៉េតង់វ័យចាស់មកពីបណ្តាក្លិបនានា នៅរាជធានីភ្នំពេញបានចូលរួមប្រកួត ដើម្បីសុខភាព មិត្តភាព និងសាមគ្គីភាព។ ការប្រកួតនេះមាន៨ក្លិបចូលរួមប្រកួត នៅឆ្នាំ២០២២នេះ ដោយព្រឹត្តិការណ៍ប៉េតង់វ័យចាស់នេះត្រូវបានរៀបចំឡើងជារៀងរាល់ឆ្នាំ ប៉ុន្តែការរៀបចំនៅទីលាននៃកសិដ្ឋាន អមរៈ នេះគឺជាលើកដំបូង ដោយទទួលបានការឧបត្ថម្ភគាំទ្រពីម្ចាស់កសិដ្ឋានអមរៈ។
លោកបន្ថែមទៀតថា ដើម្បីជួយជំរុញដល់សុខមាលភាពដល់កីឡាករវ័យចាស់ សមាគមនឹងខិតខំរៀបចំ និង បំផុសបំផុសស្មារតីដល់កីឡាករវ័យចាស់ចូលរួមឲ្យបានកាន់តែច្រើនបន្ថែមទៀត ដើម្បីលើកស្ទួយដល់វិស័យកីឡាប៉េតង់កម្ពុជាផងដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។