ក្រសួងវប្បធម៌ សហការជាមួយយូណេស្កូ បើកសិក្ខាសាលាអំពី “ការតម្រង់គោលនយោបាយលើកស្ទួយឧស្សាហកម្មវប្បធម៌ និងច្នៃប្រតិដ្ឋ”
ភ្នំពេញ៖ នៅទី២៥ ខែសីហា ឆ្នាំ២០២២ ក្រសួងវប្បធ៌ និងវិចិត្រសិល្បៈ សហការជាមួយការិយាល័យអង្គការយូណេស្កូភ្នំពេញ បានរៀបចំសិក្ខាសាលាប្រឹក្សាយោបល់ស្តីពី “ការតម្រង់គោលនយោបាយលើកស្ទួយឧស្សាហកម្មវប្បធម៌ និងច្នៃប្រតិដ្ឋ” នៅសណ្ឋាគារហាយ៉ាត់ រីជីនស៊ី ភ្នំពេញ។
សិក្ខាសាលាប្រព្រឹត្តទៅក្រោមអធិបតីលោកជំទាវ បណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌និងវិចិត្រសិល្បៈ និងឯកឧត្តម Sardar Umar Alam តំណាងយូណេស្កូប្រចាំកម្ពុជា។ ក្នុងអង្គសិក្ខាសាលាដ៏មានសារៈសំខាន់នេះ ក៏មានការអញ្ជើញចូលរួមពីសំណាក់ឯកឧត្តម លោកជំទាវ តំណាងក្រសួង ស្ថាប័ននានាចំនួន១២ និងតំណាងអង្គទូតប្រចាំព្រះរាជាណាចក្រកម្ពុជាចំនួន១៦ ព្រមទាំងលោក លោកស្រីតំណាងអង្គការសង្គមស៊ីវិលជាដៃគូពាក់ព័ន្ធ វាគ្មិនកិត្តិយសជាតិ អន្តរជាតិ និងសិក្ខាកាមសរុបប្រមាណ៩០នាក់។
អង្គសិក្ខាសាលានេះ រៀបចំឡើងក្នុងគោលបំណងសំខាន់បីគឺ៖
-ផ្សព្វផ្សាយរបាយការណ៍ជាសកលផ្សាយលើកទី៣ របស់អង្គការយូណេស្កូអំពីការរៀបចំតម្រង់គោលនយោបាយវប្បធម៌ ជំរុញឲ្យមានការច្នៃប្រតិដ្ឋដើម្បីការអភិវឌ្ឍុ។
-ពិនិត្យមើលគោលនយោបាយតាមក្រសួង ស្ថាប័នជាតិ និងរដ្ឋភាគីពាក់ព័ន្ធ ដើម្បីគាំទ្រផ្នែកច្នៃប្រតិដ្ឋ។
-សិក្សារៀនសូត្រ ដកស្រង់បទពិសោធពីបណ្តាប្រទេសនានា ដើម្បីកែទម្រង់គោលនយោបាយ លើកស្ទួយដល់ឧស្សាហកម្មវប្បធម៌ និងការច្នៃប្រតិដ្ឋនៅកម្ពុជា។
ឆ្លើយតបនឹងបំណងខាងលើ អង្គសិក្ខាសាលាបានរៀបចំរបៀបវារៈសំខាន់ពីរគឺ៖
-បទបង្ហាញនិងការពិភាក្សាផ្តោតសំខាន់លើឧស្សាហកម្មវប្បធម៌ ជាពិសេសពិនិត្យលើគោលនយោបាយតាមបណ្តាក្រសួង ដែលមានបទបង្ហាញពីតំណាងក្រសួងវប្បធម៌និងវិចិត្រសិល្បៈ ក្រសួងពាណិជ្ជកម្ម និងក្រសួងសេដ្ឋកិច្ចនិងហិរញ្ញវត្ថុ។ ជាលទ្ធផលនៃបទបង្ហាញ និងកិច្ចពិភាក្សាបានបង្ហាញឱ្យពីស្ថានភាពបច្ចុប្បន្ន និងគោលនយោបាយជាតិដែលពាក់ព័ន្ធនឹងឧស្សាហកម្មវប្បធម៌នៅកម្ពុជា កម្មសិទ្ធិបញ្ញា ម៉ាកទំនិញ ម៉ាកភូមិសាស្ត្រ និងការប្រមូលពន្ធ ព្រមទាំងការបង់ពន្ធលើវិស័យឧស្សាហកម្មវប្បធម៌។
-ឧស្សាហកម្មវប្បធម៌ក្នុងបរិបទអាស៊ី ដែលមានបទបង្ហាញពីតំណាងស្ថានទូតឥណ្ឌូណេស៊ី ហ្វីលីពីន កូរ៉េ ជប៉ុន ចិន និងវៀតណាម ដើម្បីចែករំលែកបទពិសោធស្តីអំពីគោលនយោបាយពាក់ព័ន្ធនឹងឧស្សាហកម្មវប្បធម៌ក្នុងបណ្តាប្រទេសនីមួយៗ។ ជាការកត់សម្គាល់ នៅក្នុងបរិបទការរាលដាលជំងឺកូវីដ-១៩ គេសង្កេតឃើញបណ្តាប្រទេសខ្លះនៅតែទទួលបានចំណូលថវិកាជាតិខ្ពស់ តាមរយៈវិស័យឧស្សាហកម្មវប្បធម៌ និងច្នៃប្រតិដ្ឋ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។