ករណីឆេះកន្លែងបញ្ចូលហ្គាសនៅម្តុំបឹងបៃតងម្សិលមិញ របួសធ្ងន់មនុស្ស៧នាក់
(ភ្នំពេញ) ៖ របាយការណ៍សមត្ថកិច្ចបានឲ្យដឹងថា មនុស្សបុ្រសស្រីចំនួន០៧នាក់រងរបួសធ្ងន់ស្រាល ក្នុងករណីរបូតក្បាលរុំម៉ាណេ ហ្គាស បណ្ដាលឱ្យផ្ទុះឆ្លងផ្លូវឆាបឆេះផ្ទះប្រជាពលរដ្ឋ រងការខូចខាត និងរថយន្ត ម៉ូតូកង់៣ផងដែរ។ ហេតុការណ៍នេះ បានកើតឡើងនៅវេលាម៉ោង១និង៥០នាទី រសៀលថ្ងៃទី០៣ ខែកញ្ញា ឆ្នាំ២០២២ នៅចំណុចក្បែរផ្សារបឹងបៃតង ភូមត្រពាំងស្វាយ តាមបណ្ដោយផ្លូវលេខ១៩២៨ មូលដ្ឋានសង្កាត់គោកឃ្លៀង ខណ្ឌសែនសុខ រាជធានីភ្នំពេញ។
តាមប្រភពព័ត៌មាន បានឲ្យដឹងថា នៅមុនពេលកើតហេតុ គឺរថយន្តដឹកស៊ីទែនហ្គាស បានចូលផ្ទេរហ្គាស មិនដឹងជាហេតុអ្វីស្រាប់តែរបូតក្បាលរុំម៉ាណេហ្គាស បណ្ដាលឱ្យផ្ទុះឆ្លងផ្លូវ ត្រូវអ្នកជិះម៉ូតូរ៉ឺម៉ក កំពុងជិះតាមបណ្តោយផ្លូវ ជិះម៉ូតូ និងម្ចាស់រងរបួសធ្ងន់ធ្ងរ។ បន្ថែមទៀតនោះកម្លាំងផ្ទុះហ្គាសបានខ្ទាតមកចំផ្ទះធ្វើម៉ូតូ និងរថយន្ត បណ្ដាលឲ្យឆាបឆេះយ៉ាងសន្ធោសន្ធៅ។
ភ្លាមៗនោះ កម្លាំងសមត្ថកិច្ចមូលដ្ឋាន និងកម្លាំងការិយាល័យបង្ការ និងពន្លត់អគ្គិភ័យ បានចេញរថយន្តពន្លត់អគ្គិភ័យគ្រប់គោលដៅ ជួយអន្តរាគមន៍បាញ់ពន្លត់ ប៉ុន្តែដោយទំហំនៃការឆាបឆេះ ធំក្នុងលឿនផងនោះ ធ្វើឲ្យកម្លាំងអាជ្ញាធរជំនាញបង្កា និងពន្លត់អគ្គិភ័យលំបាកក្នុងការជួយអន្តរាគមន៍ឲ្យបានទាន់ពេលវេលា តែយ៉ាងណាអគ្គិភ័យមិនបានរាលដាលដល់ការ៉ាសសាំងក្បែរនោះឡើយ។
តាមប្រភពពីមន្រ្តីជំនាញ បានឲ្យដឹងថា ក្នុងហេតុការណ៍គ្រោះអគ្គិភ័យបណ្ដាលឲ្យមនុស្សប្រុសស្រីចំនួន០៧នាក់ រងរបួសធ្ងន់ធ្ងរ ត្រូវបានបញ្ជូនទៅមន្ទីរសង្គ្រោះបន្ទាន់ពេទ្យភ្លាមៗ។
លោកវរសេនីយ៍ឯក ព្រហ្ម យ៉ន នាយការិយាល័យបង្ការ និងពន្លត់អគ្គិភ័យនៃស្នងការដ្ឋាននគរបាលរាជធានីភ្នំពេញ បានឲ្យដឹងថា ម្ចាស់ទីតាំងការ៉ាសហ្គាសមាន ឈ្មោះ ប៉ែន ភារិទ្ធ ភេទប្រុស អាយុ៦៩ ឆ្នាំ រងរបួសធ្ងន់ធ្ងរ។
លោកនាយការិយាល័យ បានឲ្យដឹងថា ក្នុងហេតុការនេះបណ្ដាលឲ្យមនុស្សប្រុសស្រីរង របួស០៧នាក់ ក្នុងនោះ ប្រុស០៦នាក់ និងស្រីម្នាក់ របួសធ្ងន់ទាំងអស់។
លោកនាយការិយាល័យ បានបន្តឲ្យដឹងថា ក្នុងប្រតិបត្តិការនេះ រថយន្តពន្លត់អគ្គិភ័យមកដល់ទីតាំងកើតហេតុចំនួន២២គ្រឿង កម្លាំងនគរបាលបានប្រើប្រាស់ រថយន្តរបស់ស្នងការនគរបាលរាជធានីភ្នំពេញចំនួន១២ គ្រឿង រថយន្តទីក្រុង ជ្រោយចង្វាចំនួន៧គ្រឿង រថយន្តស្រាបៀ កម្ពុជាចំនួន១គ្រឿង និងរថយន្តកងរាជអាវុធហត្ថ ចំនួន២គ្រឿង អត់បានប្រើប្រាស់។ ចំពោះមូលហេតុកម្លាំងអាជ្ញាធរជំនាញកំពុងធ្វើការស្រាវជ្រាវ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។