ពលករ​ខ្មែរ​ជាង១លាន​នាក់​ ​ចាប់​យក​ការងារ​ ​ក្រៅប្រទេស​ ​ទាំង​ស្របច្បាប់​-​ ​មិន​ស្របច្បាប់​

ពលករ​កម្ពុជា​ ​រហូតដល់​ជាង១លាន​នាក់​ ​បាន​ចាប់​យក​ជម្រើស​ការងារ​ក្រៅប្រទេស​ទាំង​ស្របច្បាប់​ ​និង​មិន​ស្របច្បាប់​។​ ​នេះ​បើ​តាម​ប្រសាសន៍​របស់​សម្តេច​ ​ស​ ​ខេង​ ​ឧបនាយក​រដ្ឋមន្រ្តី​ ​រដ្ឋមន្រ្តី​ក្រសួងមហាផ្ទៃ​ក្នុង​ពិធី​ ​“​ទិវា​ជាតិ​ប្រយុទ្ធ​ប្រឆាំង​អំពើ​ជួញដូរ​ ​មនុស្ស១២ធ្នូ​”​ ​លើក​ទី១២​ ​កាលពី​ថ្ងៃទី១២​ ​ខែធ្នូ​ ​ម្សិលមិញ​។

សម្តេច​ក្រឡាហោម​ ​ស​ ​ខេង​ ​មានប្រសាសន៍​ថា​ ​ក្នុងចំណោម១លាន​នាក់​ ​ដែល​មាន​ពលករ​ស្នាក់នៅ​ ​និង​ធ្វើការ​មិន​មានច្បាប់​ទម្លាប់​ ​មិនមែន​ជា​កំហុស​របស់​ពលករ​តែឯង​ទេ​ ​តែ​ដើម្បី​ជីវភាព​ទើប​រក​ការងារ​នៅ​ក្រៅប្រទេស​។​ ​ដូច្នេះ​សមត្ថកិច្ច​ពាក់ព័ន្ធ​នៃ​ប្រទេស​ទាំងពីរ​ ​មានភារៈ​កិច្ច​រួមគ្នា​ការពារ​ចំពោះ​ភាព​ខ្វះចន្លោះ​ ​នៃ​ច្បាប់​វិធានការ​ប្រព័ន្ធ​ ​និង​របៀបរបប​ការងារ​ ​ឥរិយាបថ​ ​មន្ត្រី​អនុវត្តន៍​ ​ក៏ដូចជា​និយោជក​ផ្ទាល់​ ​ដែល​អាច​ជំរុញ​ឲ្យ​មាន​បរិយាកាស​ការងារ​ល្អ​ ​ឬ​អាច​ធ្វើឲ្យ​មាន​ភាព​ខុសច្បាប់​ ​បទល្មើស​ ​ឬ​អំពើ​កេងប្រវ័ញ្ច​នានា​កើតឡើង​។

សម្ដេច​បន្ថែម​ថា​ ​មាន​ពលករ​មិន​តិច​ទេ​ដែល​បាន​និង​កំពុង​រងគ្រោះ​ថ្នាក់​ ​ក៏ដូចជា​ប្រឈម​គ្រោះថ្នាក់​ ​ដោយ​មិនទាន់​មានការ​ដោះស្រាយ​សមស្រប​ ​បាត់​ដំណឹង​ក្នុងអំឡុងពេល​ធ្វើការងារ​ ​ត្រូវ​បញ្ជូន​ចេញទៅ​ឆ្ងាយ​ ​គ្មាន​ទំនាក់ទំនង​ ​ឬក៏​អាច​បាត់បង់ជីវិត​ជាដើម​។

សម្ដេច​គូសបញ្ជាក់​ថា​ ​បញ្ហា​ទាំងអស់​នេះ​ ​មិន​អាច​ប្រទេស​ណាមួយ​ដោះស្រាយ​តែឯកឯង​បាន​ឡើយ​ ​ព្រោះ​ជា​បញ្ហា​ពាក់ព័ន្ធ​រវាង​គ្នា​ ​ហេតុនេះ​ហើយ​ទើបបាន​ជា​ទាមទារ​ឲ្យ​មាន​កិច្ច​សហប្រតិបត្តិ​ការ​ ​ប្រកបដោយ​ការទទួលខុសត្រូវ​ ​និង​សមធម៌​រវាង​សមត្ថកិច្ច​ពាក់ព័ន្ធ​គ្រប់​ផ្នែក​ ​នៃ​ប្រទេស​បញ្ជូន​និង​ប្រទេស​ទទួល​ ​ដើម្បី​កំណត់​ឲ្យ​ច្បាស់​ថា​អ្នកណា​ជា​ជនល្មើស​ ​ត្រូវ​ផ្ដន្ទាទោស​ ​និង​អ្នកណា​ជា​ជនរងគ្រោះ​ ​ត្រូវ​សង្គ្រោះ​ការពារ​ ​ដោយ​ត្រូវ​ទប់ស្កាត់​កុំ​ឲ្យ​មានរឿង​នេះ​កើតឡើង​ទៀត​៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

Close