ឥណ្ឌាទិញប្រេងពីរុស្ស៊ី ដល់ទៅ ១,២ លានបារ៉ែលក្នុងមួយថ្ងៃ
រុស្ស៊ី និងឥណ្ឌា ជាប្រទេសដៃគូយុទ្ធសាស្ត្រ ដ៏សំខាន់ និងជាប្រទេសទិញអាវុធពីរុស្ស៊ីច្រើនជាងគេ ។ ក្នុងពេលនេះឥណ្ឌា ក៏បានក្លាយទៅជាប្រទេសទិញប្រេងពីរុស្ស៊ីច្រើនជាងគេផងដែរ ដោយ ក្នុងមួយថ្ងៃៗ ទិញប្រេងឆៅជាង ១,២លានបារ៉ែល។
ទីភ្នាក់ងារព័ត៌មាន Bloomberg នៅថ្ងៃទី ១៦ខែមករា បានដកស្រង់ទិន្នន័យពីក្រុមហ៊ុនវិភាគថាមពល Vortex ដែលនិយាយថាការនាំចូលប្រេងឆៅរបស់ឥណ្ឌាពីប្រទេសរុស្ស៊ីបានកើនឡើងដល់កំណត់ត្រា ១,២ លាន បារ៉ែលក្នុងមួយថ្ងៃ សម្រាប់ខែធ្នូ ឆ្នាំ 2022កន្លងមក ។
កម្រិតនៃការនាំចូលនេះបានកើនឡើង ៣៣ ដងបើធៀបនឹងរយៈពេលដូចគ្នាក្នុងឆ្នាំ 2021 នៅពេលដែលឥណ្ឌាបានក្លាយជាអតិថិជនធំបំផុតរបស់រុស្ស៊ី ខណៈដែលលោកខាងលិចកំពុងសម្លឹងមើលកាត់បន្ថយការពឹងផ្អែកលើប្រភពថាមពលពីប្រទេសរុស្ស៊ី។ បច្ចុប្បន្ន រុស្ស៊ីបានវ៉ាដាច់អ៊ីរ៉ាក់ដើម្បីក្លាយជាប្រទេសផ្គត់ផ្គង់ប្រេងឆៅដ៏ធំបំផុតដល់ឥណ្ឌា។
ការនាំចូលប្រេងឆៅរបស់ឥណ្ឌាពីអ៊ីរ៉ាក់ និងអារ៉ាប៊ីសាអូឌីតក្នុងខែធ្នូ ឆ្នាំ 2022 ក៏បានកើនឡើងដែរ ប៉ុន្តែការកើនឡើងនេះមិនគួរឱ្យចាប់អារម្មណ៍ដូចការនាំចូលពីរុស្ស៊ីនោះទេ។ ជាក់ស្តែង ការនាំចេញប្រេងរបស់ប្រទេសអ៊ីរ៉ាក់ទៅកាន់ប្រទេសឥណ្ឌាបានកើនឡើង ៧% ក្នុងមួយខែ ដែលឈានដល់ ៨៨៦ ពាន់ បារ៉ែល ហើយការនាំចេញពីអារ៉ាប៊ីសាអូឌីតបានកើនឡើង ១២% ស្មើនឹង ៧៤៨ពាន់បារ៉ែល ។
បន្ទាប់ពីសម្ព័ន្ធមិត្តរបស់អាមេរិក និងលោកខាងលិចបានដាក់តម្លៃពិដានជាផ្លូវការលើការនាំចេញប្រេងឆៅរបស់រុស្ស៊ីចាប់ពីថ្ងៃទី ៥ខែមករា ឥណ្ឌាបានបន្តទិញប្រេងឆៅមួយចំនួនធំពីរុស្ស៊ីដោយបញ្ចុះតម្លៃខ្ពស់ និងជាលើកដំបូងដែលប្រតិបត្តិកិច្ចសន្យាមួយចំនួនក្នុងការនាំចូលពីរុស្ស៊ី។ ប្រេងឆៅចម្រាញ់ចេញពីតំបន់អាក់ទិក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។