អាជ្ញាធរខេត្តព្រះសីហនុ ត្រៀមតង់៣០០ឈុត សម្រាប់ភ្ញៀវទេសចរនៅក្នុងឱកាសថ្ងៃឆ្លងឆ្នាំសាកល
ក្នុងឱកាសបុណ្យឆ្លងឆ្នាំសកល ២០១៨-២០១៩ ខាងមុខ រដ្ឋបាលខេត្តព្រះសីហនុ សហការជាមួយមន្ទីរទេសចរណ៍ នឹងត្រៀមតង់សម្រាប់គេងប្រមាណ ៣០០ឈុត ទុកសម្រាប់ជួលឲ្យភ្ញៀវទេសចរ ដែលទៅលេងកម្សាន្តនៅខេត្តជាប់ឆ្នេរសមុទ្រមួយនេះ។
កន្លែងផ្ដល់សេវាជួលតង់សម្រាប់គេងនេះ គឺនៅឆ្នេរអូឈើទាល (អតីតអារីស្តុន) ក្រុងព្រះសីហនុ។
លើសពីនេះទៀត រដ្ឋបាលខេត្តព្រះសីហនុ ក៏បានរៀបចំភ្លើងបំភ្លឺពេលរាត្រី រៀបចំឱ្យមានបន្ទប់ទឹកស្អាត និងបង្គន់ចល័តចំនួន ៤០កន្លែង ព្រមទាំងបន្ទប់ផ្លាស់ប្តូរសម្លៀកបំពាក់សម្រាប់ភ្ញៀវជាតិ និងអន្តរជាតិ នៅក្នុងតំបន់បោះតង់នោះផងដែរ។
គួរបញ្ជាក់ដែរថា នៅសល់រំលងតែ១សប្តាហ៍ទៀតប៉ុណ្ណោះ ពិធីបុណ្យឆ្លងឆ្នាំសាកលនឹងចូលមកដល់ ហើយគេរំពឹងថា ខេត្តព្រះសីហនុអាចនឹងមានភ្ញៀវទេសចរច្រើនទៅកម្សាន្ត ដែលអាចនឹងធ្វើឲ្យខ្វះខាតនូវបន្ទប់ស្នាក់នៅ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។