អ្នកស្រុកគូលែន ខេត្តព្រះវិហារ ធ្វើពិធីឡើងអ្នកតា ក្នុងតំបន់រមណីយដ្ឋានប្រាសាទកោះកេរ
ជារៀងរាល់ឆ្នាំ ពោលគឺដល់ខែមាឃ អ្នកភូមិសំបូរ និងអ្នកភូមិកោះកេរ ឋិតក្នុងឃុំស្រយ៉ង់ ស្រុកគូលែន ខេត្តព្រះវិហារ តែងប្រារព្វពីធីសែនព្រេនឡើងអ្នកតា ឬពិធីដេញរមល់របាល (ដេញព្រាយបិសាចឧបទ្រពចង្រៃចេញពីភូមិ) ព្រោះពួកគេគិតថា ការធ្វើបែបនេះ បាននាំមកនូវសេចក្តីសុខ សេចក្តីចម្រើន ដល់ការរស់នៅរបស់អ្នកភូមិ និងមិនមានឧបទ្រពចង្រៃ បញ្ហាផ្សេងៗ ជំងឺកាចសាហាវរាតត្បាត ចូលភូមិ
ឡើយ។
ជាមួយគ្នានេះ ក្រុមការងារនាយកដ្ឋានស្រាវជ្រាវ បណ្តុះបណ្តាល និងតម្កល់ឯកសារ នៃអាជ្ញាធរជាតិព្រះវិហារ ប្រចាំតំបន់រមណីយដ្ឋានប្រាសាទកោះកេរ បានចុះសិក្សា និងអង្កេត នៅភូមិបុរាណចំនួន២គឺ ភូមិកោះកេរ និងភូមិសំបូរ ។ តាមការស្រាវជ្រាវ បង្ហាញថា ប្រជាជននៅទីនោះតែងតែមានការគោរពប្រតិបត្តិនូវជំនឿជីវចលរបស់ខ្លួន ក្នុងនោះមានពិធីមួយក្នុងពិធីជាច្រើនទៀត ដែលគេតែងប្រារព្ធធ្វើជារៀងរាល់ឆ្នាំក្នុងខែមាឃ គេហៅថា “ពិធីឡើងអ្នកតា” ។
ពិធីឡើងអ្នកតានៅភូមិសំបូរ មានភាពស្រដៀងគ្នាទៅនិងពិធីឡើងអ្នកតានៅភូមិកោះកេរដែរ ពោលគឺមានគោលបំណងរួមដូចគ្នា ទី១ គេធ្វើឡើងដើម្បីសុំសេចក្ដីសុខក្នុងការរស់នៅ និងការប្រកបមុខរបរចិញ្ជឹមជីវិតតាមរយៈការធ្វើស្រែចម្ការឲ្យកាន់តែបានផលច្រើន ពីម្ចាស់ទឹកម្ចាស់ដី (អ្នកតា) ដែលថែរក្សាក្នុងតំបន់របស់ពួកគេរស់នៅ ដែលមានកិច្ចបញ្ជាន់រូប ដើម្បីប្រាស្រ័យទាក់ទងគ្នា ជាមួយអ្នកតា ។ ទី២ គេធ្វើឡើង ក្នុងគោលបំណងដេញនូវឧបទ្រពចង្រៃនានា ពីក្នុងសហគមន៍របស់ពួកគេរស់នៅ តាមរយៈកិច្ចមួយ ក្នុងពិធីឡើងអ្នកតានោះ ដែលគេហៅថា កិច្ចដេញរមល់របាល ឬហៅថា “កិច្ចដេញព្រាយបិសាចឧបទ្រពចង្រៃចេញពីភូមិ”។
នៅពេលខាងមុខនេះ នាយកដ្ឋានស្រាវជ្រាវ បណ្តុះបណ្តាល និងតម្កល់ឯកសារ នៃអាជ្ញាធរជាតិព្រះវិហារ នឹងចងក្រងឯកសារប្រវត្តិនៃការធ្វើពិធីនេះ ដើម្បីផ្សព្វផ្សាយ ដល់មនុស្សជាតិ បានសិក្សាស្វែងយល់កាន់តែច្បាស់ ពីកេរតំណែលរបស់ដូនតា នៃជំនឿសាសនា បែបអរូបីរបស់ប្រជាជន នៅភូមិទាំងពីរនេះ។
អាជ្ញាធរជាតិព្រះវិហារ ចាត់ទុកថា ការរក្សាបាននូវទំនៀមទម្លាប់ប្រពៃណីតាំងពីដូនតា នៃពិធី ឡើងអ្នកតារបស់អ្នកភូមិសំបូរ និងភូមិកោះកេរ ក្នុងតំបន់រមណីយដ្ឋានប្រាសាទកោះកេរនេះ បានជួយលើកស្ទួយវិស័យទេសចរណ៍ នៃជំនឿសាសនាបែបអរូបី បានមួយផ្នែក និងជាអត្តសញ្ញាណមួយ ដែលបន្សល់ទុកតាំងពីដូនតាមក សម្រាប់កូនខ្មែរជំនាន់ក្រោយ ក៏ដូចជាមនុស្សជាតិទូទាំងសកលលោក បានដឹង និងសិក្សាស្វែងយល់ពីវប្បធម៌ ទំនៀបទម្លាប់ ប្រពៃណី សាសនារបស់ដូនតាខ្មែរកាន់តែច្បាស់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។