២នាក់ស្លាប់ ម្នាក់របួសធ្ងន់ ករណីគ្រោះថ្នាក់ចរាចរណ៍ ម៉ូតូ២គ្រឿងបុកគ្នា នៅក្រុងព្រះសីហនុ
ព្រះសីហនុ៖ យ៉ាងហោចណាស់មានបុរសចំនួន ២នាក់ បានស្លាប់ និងម្នាក់ទៀត បានរបួសធ្ងន់ ក្នុងហេតុការណ៍គ្រោះថ្នាក់ចរាចរណ៍មួយរវាងម៉ូតូ២គ្រឿងបុកគ្នាយ៉ាងពេញទំហឹង នៅវេលាម៉ោងជិត៤ទៀបភ្លឺ ថ្ងៃ២៤ ខែមីនា ឆ្នាំ២០២៣នេះ នៅចំណុចជិតផ្លូវបំបែក គុជអាស៊ី ក្នុងក្រុងព្រះសីហនុ។
សមត្ថកិច្ច បានបញ្ជាក់ថា គ្រោះថ្នាក់ចរាចរណ៍នេះកើតឡើង រវាងម៉ូតូ ០១គ្រឿង ម៉ាក HONDA DREAM C125 ពណ៌ខ្មៅ ពាក់ផ្លាកលេខ ព្រៃវែង1F-5289 បើកបរពីលិចទៅកើត លុះមកដល់ចំណុចកើតហេតុ បានបុកជាមួយនឹងម៉ូតូ ០១គ្រឿង ម៉ាក HONDA CLICK ពណ៌ស ពាក់ផ្លាកលេខ បាត់ដំបង1AD-0234 ក្នុងទិសដៅទិសដៅផ្ទុយគ្នា បណ្តាលឲ្យមានមនុស្សស្លាប់ និងរបួសធ្ងន់តែម្តង។
ជនរងគ្រោះខាងលើ មានឈ្មោះ ស្រ៊ន់ ភារិទ្ធ ភេទប្រុស ឆ្នាំកំណើត២០០៥ មានទីលំនៅ ភូមិត្រើយអូរ ឃុំសូរ្យសែន ស្រុកព្រៃឈរ ខេត្តកំពង់ចាម (ស្លាប់), ឈ្មោះ កៅ ថៅ ភេទប្រុស អាយុ២៦ឆ្នាំ (ស្លាប់) និងឈ្មោះ សៀវ ហុង ភេទប្រុស អាយុ៣៣ឆ្នាំ (របួសធ្ងន់) អ្នកទាំងពីររស់នៅភូមិ៣ សង្កាត់លេខ២ ក្រុង/ខេត្តព្រះសីហនុ។
ក្រោយពេលកើតហេតុសមត្ថកិច្ច បានចុះវាស់វែង និងបានបញ្ជូនគ្រោះទៅមន្ទីរពេទ្យ។ ដោយឡែកសព បានប្រគល់ជូនសាច់ញាតិយកទៅធ្វើបុណ្យតាមប្រពៃណី។ វត្ថុតាង យកមករក្សាទុកនៅការិយាល័យនគរបាលចរាចរណ៍ផ្លូវគោកដោះស្រាយបន្ត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។