សត្វអណ្តើក និងសត្វអន្សង ជិត៧០០គីឡូក្រាម ត្រូវមេព្រៃខេត្តសៀមរាបបង្ក្រាបបាន
សត្វសន្សង និងសត្វអណ្តើក ដែលមានទម្ងន់សរុបប្រមាណជិត៧០០គីឡូក្រាម ត្រូវបានកម្លាំងមន្ត្រីមេព្រៃនៃផ្នែករដ្ឋបាលព្រៃឈើបន្ទាយស្រី ខេត្តសៀមរាប ស្ទាក់ចាប់បាន ខណៈដែលឈ្មួញធ្វើសកម្មភាពដឹកជញ្ជូនក្នុងគោលបំណងជួញដូរ។
លោកអ៊ឹង វុធារ៉ា នាយផ្នែករដ្ឋបាលព្រៃឈើបន្ទាយស្រី បានឲ្យដឹងថា ការចុះបង្រ្កាបករណីដឹកជញ្ជូនសត្វព្រៃខុសច្បាប់នេះ បានធ្វើឡើងកាលពីរសៀលថ្ងៃទី២៤ ខែធ្នូ ឆ្នាំ២០១៤ នៅចំណុចផ្សារខ្នារ សង្កាត់ជ្រាវ ក្រុងសៀមរាប។ លោកបន្តថា ក្នុងហេតុការណ៍នេះ កម្លាំងរដ្ឋបាលព្រៃឈើ ដកហូតបានសត្វអណ្តើកចំនួន៧៣ក្បាល មានទម្ងន់៤៧៨គីឡូក្រាម និងសត្វអន្សងចំនួន៥៣ក្បាល មានទម្ងន់២១៩គីឡូក្រាម ព្រមទាំងដកហូតបាននូវរថយន្តម៉ាកតូយ៉ូតាហាយឡេនឌ័រមួយគ្រឿង ជាមធ្យោបាយដឹកជញ្ជូនបទល្មើស ខណៈអ្នកបើកបររត់គេចខ្លួនបាត់។
បើតាមលោក អ៊ឹង វុធារ៉ា សត្វព្រៃដែលដកហូតបានទាំងនេះ នឹងត្រូវយកទៅព្រលែងក្នុងព្រៃធម្មជាតិវិញក្នុងពេលឆាប់ៗនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។