ក្រសួងមហាផ្ទៃកំពុងស៊ើបអង្កេតរកអ្នកមានអំណាចនៅពីក្រោយការនាំចូលគ្រឿងញៀនមកកម្ពុជា
ថ្លែងក្នុងពិធីសំណេះសំណាល និងបិទវគ្គបណ្ដុះបណ្ដាលជំនាញវិជ្ជាជីវៈ ផ្នែកទ្រឹស្ដី និងអនុវត្តដល់អ្នកញៀនគ្រឿងញៀន នៅមជ្ឈមណ្ឌលបន្សាប ព្យាបាល និងស្ដារនីសម្បទាអ្នកញៀនគ្រឿងញៀន កែ ស៊ីនួន ស្ថិតនៅស្រុករតនមណ្ឌល ខេត្តបាត់ដំបង ឯកឧត្តម ស សុខា រដ្ឋមន្រ្តីក្រសួងមហាផ្ទៃ បានលើកឡើងថា តាមរយៈការស្រាវជ្រាវរកករណីនាំចូលគ្រឿងញៀន ២០គីឡូក្រាមចូលកម្ពុជាដោយជនជាតិនីហ្សេរីយ៉ាម្នាក់ ក្រសួងមហាផ្ទៃបានរកឃើញថាជននេះមានមានទំនាក់ទំនងជាមួយអ្នកនៅភ្នំពេញ ដោយមានការទទួលការកម្មង់ទិញតាមបណ្ដាក្លិបកម្សាន្តសប្បាយៗមួយចំនួន ហើយក៏មានថ្នាក់ដឹកនាំមួយចំនួននៅពីក្រោយផងដែរ។
ឯកឧត្តមរដ្ឋមន្រ្តីលើកឡើងថា ពេលនេះអាជ្ញាធរកំពុងធ្វើការស៊ើបអង្កេតពីខាងលើមកវិញចំពោះអ្នកនាំចូលគ្រឿងញៀនចូលកម្ពុជា បន្ទាប់ពីទទួលបានតំរុយថាមានអ្នកមានអំណាចនៅពីក្រោយការនាំចូលនេះ។
“អ៊ីចឹងហើយឥឡូវយើងកំពុងធ្វើការងារនេះបញ្ច្រាសទិសវិញ។ អ្នកណាអ្នកលូកលាន់ត្រូវតែរកឱ្យឃើញហើយជាពិសេសដាក់ទោសទណ្ឌតាមច្បាប់”
ជាមួយគ្នានេះឯកឧត្តមរដ្ឋមន្រ្តីក៏បញ្ជាឱ្យសមត្ថកិច្ចចុះបង្ក្រាបទីតាំងអាជីវកម្មកម្សាន្តដែលមានប្រើប្រាស់គ្រឿងញៀនឱ្យបានខ្លាំងក្លា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។