ព្រោះតែពាក្យថា “ស្តារអាងទឹក” ឈ្មួញ សេង មង្គល ឈូសឆាយព្រៃលិចទឹក រាប់សិបហិកតា ជីកយកអាចម៍ដីលក់ មួយថ្ងៃៗរាប់រយឡាន
(សៀមរាប) ៖ ព្រៃលិចទឹករាប់សិបហិកតា ស្ថិតនៅទំនប់៧៨ ក្នុងសង្កាត់ស្រង៉ែ ក្រុងសៀមរាប កំពុងតែត្រូវឈ្មួញ សេង មង្គល ឈូសឆាយជីកយកអាចម៍ដីលក់ មួយថ្ងៃៗរាប់រយឡាន ក្រោមពាក្យ ស្តារអាងទឹក ដោយអាជ្ញាធរក្រុងនៅមិនទាន់ហ៊ានបញ្ជាក់ថា មានច្បាប់ឬអត់នោះទេ។
តាមការបញ្ជាក់របស់ក្រុុមពលរដ្ឋដែលធ្វើស្រែជាប្រចាំនៅតំបន់នោះ ដីដែលឈ្មោះ សេង មង្គល កំពុងឈូសឆាយព្រៃ គឺជាឃ្លាំងស្តុកទឹកសម្រាប់ស្រោចស្រពស្រែប្រាំង។ ឃ្លាំងទឹកនេះបានបង្កើតឡើងតាំងពីឆ្នាំ១៩៧៨មកម្ល៉េះ វាមិនមែនជាកម្មសិទ្ធិរបស់បុគ្គលណាម្នាក់នោះដែរ។ ក្រៅពីផ្តល់ទឹកសម្រាប់ស្រោចស្រពដំណាំស្រូវ ឃ្លាំងទឹកទំនប់៧៨នេះ ក៏ជាជម្រកត្រីពងនិងកូន ព្រោះទីនេះហ៊ុំពទ្ធ័ដោយដើមឈើប្រភេទព្រៃលិចទឹក ដែលការពារដោយមន្ទីរជំនាញ និងពលរដ្ឋក្នុងតំបន់នេះ។
ប៉ុន្តែពេលនេះវាគួអោយសោកស្តាយជាទីបំផុត ព្រោះថា ត្រឹមតែមួយប៉ព្រិចភ្នែក ព្រៃលិចទឹកដែលជាដែនជម្រកត្រីពងកូនក៏ត្រូវរលាយអស់ក្រោមថ្វីដៃបុគ្គលឈ្មោះ សេង មង្គល។ ជននេះបានចូលមកជីកកាយហ៊ុំពទ្ធ័ធ្វើជាក្រវ៉ាត់ ហើយឈូសឆាយព្រៃ ជីកយកដីដឹកចេញយ៉ាងគគ្រឹកគគ្រេង ដោយមិនឃើញមានខាងណាមកហាមឃាត់ឡើយ។ នេះបើថ្នាក់ខេត្ត និងមន្ទីរជំនាញមិនហាមឃាត់ ហើយនៅតែបណ្តោយអោយបុគ្គលសេង មង្គល បន្តបំផ្លាញធនធានធម្មជាតិបែបនេះ ខ្លាចក្រែងតែថ្ងៃអនាគត ក្នុងសង្កាត់ស្រង៉ែសល់តែវាលរហោឋាន។ ផ្ទុយទៅវិញបើនាំគ្នាដាំកូនឈើព្រៃលិចទឹកបន្ថែមបែបអភិរក្ស តើវាខុសគ្នាពីការឈូសបំផ្លាញឬយ៉ាងណា..?
លោក ហាយ យង់ អភិបាលរងក្រុងសៀមរាប បានអោយដឹងតាមតេឡេក្រាមថា ការដ្ឋានជីកស្តារនេះ ឯកសារបានឆ្លងកាត់ក្រុងហើយ តែថាខេត្តចេញលិខិតអនុញាតិឬអត់ លោកក៏មិនបានដឹងដែរ។ កន្លងមក ក្រោយមានការចុះផ្សាយព័ត៍មានមន្ទីរពាក់ពន្ធ័បានចុះពិនិត្យនិងបិទការដ្ឋានម្តងហើយ។
យ៉ាងណាក៏ដោយក្រុមពលរដ្ឋក៏ដូចជាមហាជនក្នុងខេត្តសៀមរាប ទទូចសុំអោយមានការទប់ស្កាត់ ហើយ រក្សាព្រៃលិចទឹកខាងលើនេះ កុំព្រោះតែប្រយោជន៍តិចតួច ឃុបឃិតបំផ្លាញសម្បត្តិដូនតាខ្មែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។