បាក់ដីនៅវៀតណាម សម្លាប់មនុស្សមនុស្ស ៦នាក់ និងរបួសជិត ២០នាក់

ការរអិលបាក់ដីនៅប្រទេសវៀតណាមបានសម្លាប់មនុស្ស យ៉ាងតិច៦នាក់ និង របួសជិត២០នាក់ នេះបើតាមការបញ្ជាក់ពីមន្ត្រីទីភ្នាក់ងារគ្រោះមហន្តរាយ នៅថ្ងៃចន្ទនេះ។

ប្រភពបានអះអាងថា ហេតុការណ៍នេះកើតឡើង ដោយសារតែភ្លៀងធ្លាក់ខ្លាំង ខណៈខ្សែក្រវាត់កណ្តាល ដែលរងគ្រោះដោយទឹកជំនន់ បានស៊ូទ្រាំនឹងភ្លៀងធ្លាក់ ឥតឈប់ឈរ។

យោងតាមអាជ្ញាធរគ្រប់គ្រងគ្រោះមហន្តរាយ និងទំនប់វារីអគ្គិសនី បានឱ្យដឹងថា រថយន្តក្រុងដឹកអ្នកដំណើរមួយគ្រឿងបានរងគ្រោះពីការធ្លាក់ដី និងថ្ម នៅក្នុងតំបន់មួយ នៃខេត្ត Khanh Hoa កាលពីល្ងាចថ្ងៃអាទិត្យ ដោយបានសម្លាប់មនុស្ស យ៉ាងហោចណាស់ ៥នាក់ និង ១៨នាក់ផ្សេងទៀតរងរបួស បញ្ជូនទៅមន្ទីរពេទ្យភ្លាមៗ។ ក្រៅពីនេះ ក៏មានការបាក់ដីនៅកន្លែងស្នាក់នៅ របស់កម្មករ ស្លាប់មនុស្សម្នាក់ និង បាត់ខ្លួនម្នាក់។

យោងតាមការិយាល័យស្ថិតិជាតិ របស់ប្រទេសវៀតណាម បានឱ្យដឹងថា គ្រោះមហន្តរាយធម្មជាតិបានធ្វើឱ្យមនុស្ស ចំនួន២៧៩នាក់បានស្លាប់ ឬ បាត់ខ្លួន ក្នុងឆ្នាំនេះ និង បានបង្កការខូចខាត ជាង២ពាន់លានដុល្លារ។

ប្រទេស អាស៊ីអាគ្នេយ៍ មួយនេះ ងាយនឹងមានភ្លៀងធ្លាក់ខ្លាំង នៅចន្លោះខែមិថុនា និង ខែកញ្ញា ប៉ុន្តែ ភស្តុតាងវិទ្យាសាស្ត្របានកំណត់នូវគំរូនៃការប្រែប្រួលអាកាសធាតុ ជំរុញឡើងដោយមនុស្ស ដែលធ្វើឱ្យអាកាសធាតុអាក្រក់ កាន់តែញឹកញាប់ និង កាន់តែបំផ្លិចបំផ្លាញ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។