វ៉េស្ទឡាញន៍ និងក្លិបបាល់ទាត់បឹងកេត ចុះអនុស្សរណៈយោគយល់លើការអភិវឌ្ឍវិស័យកីឡាបាល់ទាត់ថ្នាលវ៉េស្ទឡាញន៍ឱ្យកាន់តែប្រសើរ
ក្រុមហ៊ុន វ៉េស្ទឡាញន៍ អេឌ្យូខេសិន គ្រុប ដែលមានសាលារៀន វ៉េស្ទឡាញន៍ និងសាលារៀន ណត្សឡាញន៍ បានស្ម័គ្រចិត្តរួមគ្នាជាមួយក្លិបបាល់ទាត់កម្រិតអាជីព បឹងកេត ដោយបានឈានដល់ការចុះអនុស្សរណៈយោគយល់ កាលពីល្ងាចថ្ងៃទី៣០ ខែមេសា ឆ្នាំ២០១៩ នៅ សាខាសាលារៀនវ៉េស្ទឡាញន៍ ស្ថិតនៅសង្កាត់ទឹកល្អក់ ខណ្ឌទួលគោក រាជធានីភ្នំពេញ ដើម្បីរៀបចំការបណ្តុះបណ្តាល និងអភិវឌ្ឍន៍វិស័យកីឡាបាល់ទាត់ថ្នាលយុវជនរបស់វ៉េស្ទឡាញន៍ឱ្យត្រឹមត្រូវបានក្បួនបច្ចេកទេសបាល់ទាត់។
លោក ប៉ិច បូឡែន ប្រធាននាយកប្រតិបត្តិ ក្រុមហ៊ុនវេស្ទឡាញន៍ អេឌ្យូខេសិន គ្រុបបានបង្ហាញពីគោលបំណងរបស់ខ្លួន ក្នុងឆន្ទៈចង់ឱ្យសិស្សានុសិស្សរបស់ខ្លួនទទួលបានឱកាសបណ្តុះបណ្តាលកីឡាបាល់ទាត់ពីក្លិប អាជីពបឹងកេត តាមស្តង់ដារបច្ចេកទេស។ លោកបានបន្ដថា ជាធម្មតា សកម្មភាពនៅក្នុងវិស័យអប់រំតែងតែពាក់ព័ន្ធគ្នាយ៉ាងជិត ស្និទ្ធជាមួយវិស័យកីឡា និងសិល្បៈជាដើម ដោយសាលារៀន វ៉េស្ទឡាញន៍ និងសាលារៀនណត្សឡាញន៍ កំពុងធ្វើបានល្អប្រសើរ ដែលមានទាំងសិល្បៈ និងកីឡា។ ទន្ទឹមនេះ ដោយសារតែយើងបានមើលឃើញពីការសន្ទុះរីកចម្រើនជាបន្តបន្ទាប់ ដោយបច្ចប្បន្នមានកីឡាករនៅសាខាជាង១០ មានជាង២០០នាក់ ទើបថ្នាក់ដឹកនាំក្រុមហ៊ុន សម្រេចចិត្តចាប់ដៃគូជាមួយបឹងកេត ដើម្បីឱ្យមានបច្ចេកទេសកាន់តែល្អប្រសើរ។ លោកបន្ថែមទៀតថា បើសិនជាសិស្សានុសិស្ស ទាំងអស់នេះចង់ក្លាយជាកីឡាករអាជីព នាថ្ងៃអនាគតអាចបន្តហ្វឹកហ្វាត់ ជាមួយបឹងកេតបាន ហើយប្រសិនបើពួកគាត់មិនចង់ក្លាយជាកីឡាករអាជីពទេនោះ ក៏ពួកគាត់អាចហ្វឹកហាត់ និងលេងកីឡាដើម្បីសុខភាព និងលេងតាមក្បួនខ្នាតត្រឹមត្រូវនៃបច្ចេកទេសបាល់ទាត់ផងដែរ។ លោកបានបញ្ជាក់ពីមូលហេតុដែលចាប់ដៃគូជាមួយ បឹងកេតនោះ ព្រោះលោកបានមើលឃើញពីបឹងកេតតែងតែឧស្សាហ៍ ធ្វើកិច្ចការសង្គមនានា ជាពិសេសគឺសិស្សានុសិស្សរបស់លោកស្រឡាញ់បឹងកេតច្រើនជាង។
លោកស្រី ពុធ ធីតា ប្រធាននាយកប្រតិបត្តិ នៃក្លិបកីឡាបាល់ទាត់បឹងកេតបានសម្តែងនូវក្តីរីករាយ ដែលក្លិបបឹងកេតបានចាប់ដៃគូជាមួយ វ៉េស្ទឡាញន៍ អេឌ្យូខេសិន គ្រុប ដើម្បីផ្តល់គ្រូបង្វឹកផ្តល់បច្ចេកទេសឱ្យបានត្រឹមត្រូវជូនដល់កីឡាករ ដែលជាសិស្សរបស់វ៉េស្ទឡាញន៍។ លោកស្រីបន្ថែមថា នេះដោយសារការមើលឃើញពី គុណភាពនៃវិស័យអប់រំរបស់ក្រុមហ៊ុននេះឈានមុខគេនៅកម្ពុជា ហើយមានឆន្ទៈខ្ពស់ក្នុងការគោលដៅឱ្យថ្នាល យុវជនរបស់ខ្លួនឱ្យទទួលបានបច្ចេកទេសត្រឹមត្រូវតាមក្បួនខ្នាត។
លោក បែ មករា អ្នកចាត់ការទូទៅក្លឹបបឹងកេតបញ្ជាក់ដែរថា ក្លិបបឹងកេតនឹងបើកវគ្គបណ្តុះបណ្តាលខ្លីៗជូនដល់គ្រូបង្វឹកជាបន្តបន្ទាប់ ហើយបឹងកេតក៏បានតាមដានការប្រកួតពានរង្វាន់ វ៉េស្ទឡាញន៍ ឆ្នាំ២០១៩ មកពីសាខាទាំង១០ ដែលធ្វើជារៀងរាល់ឆ្នាំដែរ ក្រៅពីនេះលោកនឹងរៀបចំការប្រកួតពានរង្វាន់នានាបន្ថែមទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។