សមត្ថកិច្ចខេត្តស្ទឹងត្រែងចាប់ខ្លួនជនជាតិឡាវ ជាមួយគ្រឿងញៀនជិត១គីឡូក្រាម
ជនជាតិឡាវម្នាក់ត្រូវបានកម្លាំងកងរាជអាវុធហត្ថខេត្តស្ទឹងត្រែងចាប់ឃាត់ខ្លួន កាលពីវេលាម៉ោងប្រមាណ១២ និង៣០នាទីថ្ងៃត្រង់ ថ្ងៃទី៨ ខែឧសភា នេះ នៅចំណុចស្ពានទី២ ក្នុងភូមិខាំផាន់ សង្កាត់សាមគ្គី ក្រុងស្ទឹងត្រែង ក្រោយពីរកឃើញគ្រឿងញៀនមួយកញ្ចប់ធំ ដែលមានទម្ងន់ជិត១គីឡូក្រាម ។
លោកវរសេនីយ៍ឯក ដួង វិចិត្រ មេបញ្ជការរងកងរាជអាវុធហត្ថខេត្តស្ទឹងត្រែងបានឲ្យដឹងថា ជនសង្ស័យ ដែលកម្លាំងអាវុធហត្ថឃាត់ខ្លួន មានឈ្មោះធឿ ហាយ អាយុ ៣៣ឆ្នាំ ភេទប្រុស ជាជនជាតិឡាវ រស់នៅភូមិចាំម៉ឺយ ស្រុកភុងសាលី ខេត្តភុងសាលី ប្រទេសឡាវ។ ចំណេកវត្ថុតាងជាគ្រឿងញៀនប្រភេទមេតំហ្វេតាមីន ទម្ងន់៩៩៩,៦ក្រាម ស្មើនឹងជិត១គីឡូក្រាម។
បន្ទាប់ពីឃាត់ខ្លួននិងដកហូតថ្នាំញៀនរួចមក ជនជាតិឡាវខាងលើត្រូវបាននាំមកកាន់ទីបញ្ជាការដ្ឋានកងរាជអាវុធហត្ថខេត្តដើម្បីសាកសួរ និងកសាងសំណុំរឿងបញ្ជូនទៅសាលាដំបូងខេត្តចាត់ការបន្តទៅតាមច្បាប់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។