រថយន្តក្រុងក្រុមហ៊ុន អូឡាំពិក បុកជាមួយរថយន្តហ៊ីយ៉ាន់ដាយ ស្លាប់តៃកុងម្នាក់ និងភ្ញៀវជិត២០នាក់រងរបួស
បុរសជាតៃកុងរថយន្តក្រុងម្នាក់ បានដាច់ខ្យល់ស្លាប់ភ្លាមៗនៅក្នុងរថយន្ត និងភ្ញៀវជិត២០នាក់ រងរបួសធ្ងន់ស្រាល បន្ទាប់ពីរថយន្តក្រុងរបស់ក្រុមហ៊ុន អូឡាំពិក ទៅបុករថយន្តហ៊ីយ៉ាន់ដាយ បត់ត្រឡប់ក្រោយទទឹងផ្លូវ យ៉ាងពេញទំហឹង។ យ៉ាងណា ភ្ញៀវលើរថយន្តក្រុង ដែលរងរបួសធ្ងន់ស្រាលទាំងអស់ ត្រូវបានបញ្ជូនទៅសង្គ្រោះនៅមន្ទីរពេទ្យហើយផងដែរ។
គ្រោះថ្នាក់ចរាចរណ៍ដ៏រន្ធត់នេះ បានកើតឡើងនៅលើផ្លូវជាតិលេខ៦ ត្រង់ចំណុចភូមិបែកពាង ឃុំជាលា ស្រុកបាធាយ ខេត្តកំពង់ចាម វេលាម៉ោង១៖៣០នាទី រំលងអធ្រាត្រចូលថ្ងៃអង្គារ ១៣កើត ខែផល្គុន ឆ្នាំរកា នព្វស័ក ពុទ្ធសករាជ ២៥៦១ ត្រូវនឹងថ្ងៃទី២៧ ខែកុម្ភៈ ឆ្នាំ២០១៨។
សមត្ថកិច្ចឲ្យដឹងថា នៅវេលាកើតហេតុខាងលើ មានគ្រោះថ្នាក់ចរាចរណ៍ដ៏គួរឲ្យរន្ធត់នៅលើផ្លូវជាតិលេខ៦ រវាងរថយន្តម៉ាក ហ៊ីយ៉ាន់ដាយ ពាក់សា្លកលេខ ព្រះសីហនុ 3A-2983 បានបត់ត្រឡប់ក្រោយនៅទទឹងថ្នល់ ត្រូវបានរថយន្តក្រុងដឹកអ្នកដំណើរមួយគ្រឿងរបស់ក្រុនហ៊ុន អូឡាំពិក ធ្វើដំណើរពីសៀមរាប ទៅភ្នំពេញ ដែលមានអ្នកដំណើរជិះក្នុងរថយន្តចំនួន១៩នាក់ បើកទៅបុកចំកណ្តាលរថយន្ត ហ៊ីយ៉ាន់ដាយ តែម្ដង។
សមត្ថកិច្ចបញ្ជាក់ថា ក្នុងហេតុការណ៍គ្រោះថ្នាក់ចរាចរណ៍នេះ បណ្ដាលឲ្យសា្លប់អ្នកបើកបររថយន្តក្រុងម្នាក់ ឈ្មោះ កែវ សាវុធ ភេទប្រុស អាយុ៣៧ឆ្នាំ មានទីលំនៅភូមិជ្រលង ឃុំប្រាសាទ ស្រុកកំពង់ត្របែក ខេត្តព្រៃវែង និងរបួសមនុស្សជាអ្នកដំណើរចំនួន១៩នាក់ ក្នុងនោះស្រី១០នាក់ ដែលរួមមាន ជនជាតិខ្មែរ របួស៤នាក់/ស្រី១នាក់ (ធ្ងន់៣ ស្រាល១) ជនជាតិថៃ ៣នាក់/ប្រុស៣នាក់ (ធ្ងន់១ ស្រាល២) ជនជាតិបារាំង ២នាក់/ស្រី១ (ស្រាល២) ជនជាតិអាឡឺម៉ង់ ៤នាក់/ស្រី១ (ស្រាល៤) ជនជាតិអ៊ីស្រាអែល២នាក់/ស្រី២ (ស្រាល២) ជនជាតិអង់គ្លេស៣នាក់/ស្រី៣ (ធ្ងន់១ ស្រាល២) ជនជាតិចិន១/ប្រុស១ (ធ្ងន់១)។ សរុបទាំងខ្មែរ និងបរទេសអ្នករបួសធ្ងន់៦ ស្រាល១៣នាក់ និងស្លាប់តៃកុងរថយន្តក្រុងម្នាក់។
ក្រោយកើតហេតុ សមត្ថកិច្ចមូលដ្ឋាន សហការជាមួយកម្លាំងសមត្ថកិច្ចជំនាញ បានអន្តរាគមន៍ហៅរថយន្តសាមុយដឹកយកជនរងគ្រោះទៅសង្គ្រោះអាយុជីវិត ហើយទាក់ទងទៅគ្រួសារសពតៃកុងរថយន្ត យកសាកសពទៅធ្វើបុណ្យតាមប្រពៃណី។ ដោយឡែក រថយន្តទាំងពីរគ្រឿង ត្រូវបានវាស់វែងយកទៅរក្សាទុកនៅស្នងការដ្ឋាននគរបាលខេត្ត ដើម្បីរង់ចាំដោះស្រាយតាមច្បាប់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។