មន្រ្តីជាន់ខ្ពស់ក្រសួងសុខាភិបាលអះអាងថា នៅក្នុងឆ្នាំ២០១៩នេះ ជំងឺគ្រុនឈាម និងរាគរួសបាន រាតត្បាតខ្លាំងទៅលើកុមារកម្ពុជា
មន្រ្ដីជាន់ខ្ពស់ក្រសួងសុខាភិបាលបានអះអាងថា ក្នុងរយៈពេល៦ខែឆ្នាំ២០១៩នេះ បើតាមការដាននិងអង្គេតឃើញថា ជំងឺគ្រុនឈាម និងជំងឺរាគរួស បាននិងកំពុងរាតត្បាតខ្លាំងទៅលើកុមារ និងមានការកើនឡើងជាងឆ្នាំ២០១៨ គួរឱ្យបារម្ភ។ ក្នុងរយៈពេល៦ខែ ឆ្នាំ២០១៩នេះ អ្នកកើតជំងឺគ្រុនឈាម មានរហូតដល់ទៅ៨.០០០នាក់ហើយ។
ថ្លែងប្រាប់ក្រុមអ្នកសារព័ត៌មាន បន្ទាប់ពីបើកសន្និសីទ ស្ដីពីបច្ចុប្បន្នភាពរោគកុមារវិទ្យាលើក ទី៤ នៅកម្ពុជា នៅខេត្តសៀមរាប កាលពីថ្ងៃទី២៥ ខែឧសភា ឆ្នាំ២០១៩ ឯកឧត្តម យិត ស៊ុនណារ៉ា អនុរដ្ឋលេខាធិការក្រសួងសុខាភិបាល និងជាប្រធានសមាគមគ្រូពេទ្យកុមារកម្ពុជា បានលើកឡើងថា ការកើនឡើងខ្ពស់នៃចំនួនជំងឺគ្រុនឈាមនេះ ក្រសួងសុខាភិបាលបានយកចិត្តទុកដាក់ខ្ពស់ក្នុងការតាមដានស្ថានការណ៍ទប់ស្កាត់ និងធ្វើការព្យាបាលឱ្យមានប្រសិទ្ធភាពខ្ពស់។
ឯកឧត្តមបានបញ្ជាក់ថា ដើម្បីតាមដាន និងទប់ស្កាត់ការកើតឡើងនូវប្រភេទជំងឺថ្មីមកលើកុមារ សមាគមគ្រូពេទ្យកុមារកម្ពុជា តែងតែបានប្រារព្ធសន្និសីទនេះ យ៉ាងទៀតទាត់ ក្នុងមួយឆ្នាំម្ដង ក្នុងគោលបំណង ដើម្បីផ្ដល់នូវវេទិកា ដល់អ្នកឯកទេសផ្នែករោគកុមារទាំងក្នុងប្រទេស និងក្រៅប្រទេស បានចែករំលែក និងផ្ដាស់ប្ដូរនូវបទពិសោធន៍រវាងគ្នា ក៏ដូចជាជួយផ្ដល់នូវចំណេះដឹងថ្មីៗ ទាក់ទងនឹងរោគកុមារ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។