ចាញ់ល្បែងជំពាក់គេច្រើន ស្ត្រីម្នាក់ ប្លន់សម្លាប់លោកយាយអាយុ៧១ឆ្នាំ នៅស្រុកសូទ្រនិគម
ខេត្តសៀមរាប៖ ករណីប្លន់សម្លាប់លោកយាយម្នាក់ នៅស្រុកសូទ្រនិគម យកទ្រព្យសម្បត្តិ កម្លាំងនគរបាលខេត្តសៀមរាប បានបំបែកសំណុំរឿងចាប់ខ្លួនជនដៃដល់ដែលជាស្ត្រីម្នាក់ កាលពីវេលារសៀល ថ្ងៃទី០៧ ខែធ្នូ ឆ្នាំ២០២០ ស្ថិតនៅភូមិដាក់ផ្កា ឃុំតាយ៉ែក ស្រុកសូនិគម ខេត្តសៀមរាប។
នគរបាលខេត្តសៀមរាប បានឲ្យដឹងថា ករណីអំពើលួចមានស្ថាន់ទោស បានប្រព្រឹត្ត នៅចំណុចត្រពាំងរូង ស្ថិតនៅភូមិដាក់ផ្កា ឃុំតាយ៉ែក ស្រុកសូនិគម ខេត្តសៀមរាប កាលពីវេលាម៉ោង១៥នឹង០០នាទី ថ្ងៃទី០៤ ខែធ្នូ ឆ្នាំ២០២០ លើជនរងគ្រោះឈ្មោះ មឿន ត្រៀម ភេទស្រី អាយុ៧១ឆ្នាំ។ រីឯជនសង្ស័យឈ្មោះ ម៉ូវ ភា ភេទស្រី អាយុ៣៣ឆ្នាំ រស់នៅភូមិតាយ៉ែក ឃុំតាយ៉ែក ស្រុកសូទ្រនិគម ខេត្តសៀមរាប។
ករណីនេះ ជនសង្ស័យបានសារភាពថា ខ្លួនពិតជាបានប្រព្រឹត្តបទល្មើសខាងលើពិតប្រាកដមែន ដោយនៅពេលកើតហេតុ រូបគេបានទៅជីកដំឡូវជ្រូកជាមួយជនរងគ្រោះនៅចំណុចកើតហេតុ។ ដោយមានឱកាសល្អខ្លួនយកជំនីក ដងដែកវាយលើជនរងគ្រោះចំនួន៣ជំនីក បណ្តាលឲ្យសន្លប់។ ក្រោយធ្វើសកម្មភាពទ្រព្យសម្បត្តិដែលខ្លួនយកពីជនរងគ្រោះមានប្រាក់ខ្មែរចំនួន២លាន ៨០ម៉ឺន ប្រាក់ដុល្លារចំនួន១០០ដុល្លារ ខ្សែកលោហៈធាតុពណ៌ទង់ដែងមួយខ្សែ ចិញ្ចៀនលោហធាតុពណ៌ទង់ដែងពីរវង់ ដុំលោហៈធាតុពណ៌ទង់ដែង១កញ្ចប់តូច។ មូលហេតុដែលគាត់សម្លាប់ជនរងគ្រោះ ព្រោះខ្លួនចាញ់ល្បែង និងជំពាក់ប្រាក់គេច្រើន។
បច្ចុប្បន្នកម្លាំងនគរបាលជំនាញន កំពុងរៀបចំសំណុំរឿងបញ្ជូនខ្លួនស្ត្រីជនសង្ស័យខាងលើទៅតុលាការ ដើម្បីចាត់ការតាម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។