ផ្ទុះរឿងអាស្រូវរបស់នាយរងសង្កាត់រដ្ឋបាលជលផលឃុំពាមបាង និងមេស្នាក់ការបរិស្ថាន បណ្តោយឲ្យមានបទល្មើសនេសាទ
កំពង់ធំ ៖ ប្រភពពីប្រជាពលរដ្ឋថា ប៉ុន្មានចុងក្រោយនេះ លោក ហុក មុន នាយរងសង្កាត់រដ្ឋបាលជលផលឃុំពាមបាងធ្លាក់ដៃមិនហ៊ានលើកដៃបង្ក្រាបរាល់បទល្មើសនេសាទទេ ព្រោះប្រពន្ធខ្លួនឯងបានទៅឈរជើងនៅនិងស្នាក់ការចាំទិញត្រីពីបទល្មើសនេសាទតែម្តង។
ចំណែកលោកផាន់ សុផុន ដែលជាមេស្នាក់ការបរិស្ថានឈរជើងជាមួយលោក ហុក មុន នៅក្នុងភូមិសាស្ត្រភូមិបឡត ឃុំពាមបាង ស្រុកស្ទោង ខេត្តកំពង់ធំវិញ ក៏កំពុងល្បីខាងកាងបទល្មើសនេសាទគ្រប់រូបភាព ហើយនិងដើរប្រមូលលុយពីបទល្មើសនេសាទ រាប់ឆ្នាំមកហើយ។
បើតាមបងប្អូនប្រជាពលរដ្ឋរស់នៅផ្ទះបណ្ដែតទឹកលើផ្ទៃបឹងទន្លេសាបថា ពួកគាត់តែងឃើញសកម្មភាពពុករលួយជាប្រព័ន្ធរបស់មន្ត្រីគ្រាប់ល្ពៅ ជាមួយថៅកែឡូត៍នេសាទ កើតឡើងរាប់ឆ្នាំហើយ ប៉ុន្តែថ្នាក់ដឹកនាំក្រសួងពាក់ព័ន្ធចេះតែមើលរំលងហើយគ្មានការផ្លាស់ប្ដូរមន្រ្តីសោះ ដោយទុកឲ្យមន្ត្រីពុករលួយចាក់គ្រឹះដុះស្លែ រួចរួមដៃគ្នាបំផ្លាញធនធានមច្ឆាជាតិ ជាក់ស្ដែងរបាំងស្បៃមុងពណ៍ខៀវ ក្រហម ណូរ៉ាវ ឆក់ត្រជាក់ឆក់ក្ដៅ មានគ្រប់រូបភាពតែមិនដែលឃើញការបង្ក្រាបឲ្យមានប្រសិទ្ធភាពនោះទេ ហើយនៅពេលដែលអ្នកសារព័ត៌មានធ្វើបទសម្ភាសន៍មន្ត្រីទាំងនោះតែងតែឆ្លើយដាក់ថា ប្រជាពលរដ្ឋ ក៏ប៉ុន្តែយកលុយពីប្រជាពលរដ្ឋជារៀងរាល់ឆ្នាំដើម្បីរួមគំនិតគ្នាបំផ្លាញមច្ឆាជាតិទាំងតូចទាំងធំ ។
ចំពោះករណីទាំងនេះ យើងមិននៅមិនទាន់អាចទាក់ទងសុំការបំភ្លឺពីលោក ហុក មុន នាយរងសង្កាត់រដ្ឋបាលជលផលឃុំពាមបាង និងលោកផាន់ សុផុន មេស្នាក់ការបរិស្ថានបាននៅឡើយទេនៅថ្ងៃនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។