រដ្ឋបាលក្រុងសៀមរាប បើកយុទ្ធនាការសម្អាតទឹកស្ទឹងសៀមរាប
សៀមរាប៖ កាលពីថ្ងៃទី២៣ ខែកក្កដា ឆ្នាំ២០២០ម្សិលមិញ រដ្ឋបាលក្រុងសៀមរាប សហការជាមួយនឹងអង្គការ COMPED រួមជាមួយមន្ត្រីអ្នកមុខអ្នកការក្នុងខេត្តសៀមរាប និងមានជំនួយឧបត្ថម្ភពីអង្គការផែនដីមួយ សាគរមួយ បើកយុទ្ធនាការសម្អាតទឹកស្ទឹងសៀមរាប ដែលជាគម្រោងសាកល្បងរបស់អង្គការ COMPED ក្នុងរយៈពេល៣ខែ សម្រាប់ការសម្អាតទឹកស្ទឹងសៀមរា។
លោក សំ ផល្លា នាយកអង្គការកែច្នៃសំរាមនិងការសិក្សានៅកម្ពុជា ហៅកាត់ថា COMPED បានឲ្យដឹងថា យុទ្ធនាការសម្អាតទឹកស្ទឹងសៀមរាបនេះ កំពុងស្ថិតក្នុងរយៈពេលនៃការសាកល្បងដើម្បីសិក្សាអំពីទំហំប្រតិបត្តិការរបស់ខ្លួន និងមិនទាន់បានបញ្ជាក់ច្បាស់ថា ក្រោយការសិក្សា គម្រោងនេះមានរយៈពេលប៉ុន្មានឆ្នាំនោះយ៉ាងណាក៏ដោយ ក៏ប៉ុន្តែ ទោះជាមានការលំបាកក្នុងទម្ងន់ណាក៏ដោយ គម្រោងនេះពិតជាមិនរាថយនោះឡើយ ហើយឧបករណ៍ដែលបំពាក់នៅលើទូក Seehamster មានតួនាទីត្រឹមតែការប្រមូលសំរាមនៅលើផ្ទៃទឹកតែប៉ុណ្ណោះ ក៏ប៉ុន្តែសម្រាប់ស្ទឹងសៀមរាប នឹងត្រូវបំពេញតួនាទីដែលមានទម្ងន់ច្រើនជាងនេះ ពិសេសនោះគឺសំអាតសារាយ ដែលមានឫសស្មុគស្មាញចាក់ជ្រៅចូលទៅបាតស្ទឹង ។
លោក សំ ផល្លា បានឲ្យដឹងទៀតថា បើតាមពិតទៅគម្រោងនេះ ត្រូវបានអនុវត្តនៅដងស្ទឹងសង្កែ ខេត្តបាត់ដំបងអស់រយៈពេលជិត៣ឆ្នាំកន្លងមកហើយ និងមានគម្រោងបន្តផងដែរ សម្រាប់ប្រតិបត្តិការនៅដៃទន្លេសាប និងទន្លេមេគង្គ រាជធានីភ្នំពេញ ហើយកម្មវិធីគ្រប់គ្រងសំណល់នៃអង្គការ COMPED ដែលមានបេសកកម្មទាក់ទងទៅនឹងសំរាម ស្ថិតក្នុងគោលការណ៍មិនរកប្រាក់ចំណេញ ក៏ប៉ុន្តែមានតម្រូវការចាំបាច់ ពីដៃគូចូលរួម រាប់ទាំងស្មារតីគាំទ្រអនុវត្តពីសំណាក់វិស័យឯកជន ប្រជាពលរដ្ឋ ពិសេសនោះគឺក្រុមហ៊ុនដឹកជញ្ជូនប្រមូលសំរាម ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។