ទប់ស្កាត់មហាបាតុកម្ម ថៃចាប់ខ្លួនសកម្មជនប្រឆាំងជាច្រើនរូប
សកម្មជននយោបាយ ជាច្រើនរូបត្រូវបានកម្លាំងសន្តិសុខ ថៃចាប់ខ្លួន ដោយសារតែបានឡើងគម្រោងធ្វើមហាបាតុកម្ម នៅទីក្រុងបាងកក់ប្រឆាំងរដ្ឋាភិបាលរបស់នាយករដ្ឋមន្ត្រីប្រាយុទ្ធចាន់អូចា។
តាមសារព័ត៌មាន Channel news Asia បានផ្សាយនៅថ្ងៃទី១៤ខែតុលាថា ប៉ូលិសនៅក្នុងប្រទេសថៃ បានចាប់ខ្លួនសកម្មជននយោបាយជាច្រើននាក់ ដែលមានគម្រោងបោះតង់នៅឯទីលាន សម្រាប់ការធ្វើបាតុកម្មតវ៉ាទ្រង់ទ្រាយធំមួយ ដែលត្រូវបានគ្រោងធ្វើឡើងនៅថ្ងៃពុធនេះ។
ការចាប់ខ្លួនសកម្មជននយោបាយខាងលើនេះ ត្រូវបានធ្វើឡើងកាលពីថ្ងៃ១៣ខែតុលា បន្ទាប់ពីប៉ូលិសថៃបានចាប់ផ្ដើមរុះរើតង់របស់ក្រុមបាតុករ ដែលបានធ្វើដំណើរមកពីតាមខេត្តនានា មកកាន់ទីក្រុងបាងកក។ កំឡុងប្រតិបត្តិការរុះរើតង់នេះ ក៏មានការប៉ះទង្គិចគ្នាផងដែររវាងក្រុមបាតុករ និងប៉ូលិសដែលបានអះអាងថា ពួកគេបានស្នើឱ្យរុះរើតង់តែក្រុមបាតុករមិនព្រម។
គួរបញ្ជាក់ថា មកទល់ពេលនេះមិនទាន់មានការបញ្ជាក់ថា តើបាតុករប៉ុន្មាននាក់ត្រូវបានឃាត់ខ្លួន កាលពីថ្ងៃអង្គារម្សិលមិញនោះទេ ខណៈក្រុមបាតុករផ្សេងៗទៀត គ្រោងនឹងធ្វើបាតុកម្មទ្រង់ទ្រាយធំ ក្នុងទីក្រុងបាងកកនៅថ្ងៃពុធនេះ ដើម្បីទាមទារឱ្យមានកំណែទម្រង់នៃរដ្ឋាភិបាល និងលោកនាយករដ្ឋមន្ត្រី ប្រាយុទ្ធ ចាន់អូចា ចុះចេញពីតំណែង ស្របពេលដែលបាតុករខ្លះទៀត បានស្រែកទាមទារឱ្យមានការកែទម្រង់របបរាជានិយមថៃបច្ចុប្បន្ន ដែលពួកគេយល់ថា បានផ្ដល់អំណាចហួសហេតុដល់ព្រះមហាក្សត្រ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។