អ្នកជំនាញមុជទឹកអង់គ្លេសបានរកឃេីញក្រុមក្មេងថៃដែលវង្វេងក្នុងល្អាងភ្នំមុនគេបង្អស់
ថៃ ៖ ក្រុមក្មេងប្រុសដែលមានអាយុចន្លោះពី ១១ទៅ១៦ឆ្នាំនិងគ្រូបង្វឹកវ័យ ២៥ ឆ្នាំរបស់ពួកគេបានបាត់ខ្លួនកាលពីថ្ងៃទី ២៣ ខែមិថុនា អំឡុងពេលចូលទៅក្នុងរូងភ្នំ ពេលនេះពួកគេត្រូវបានរកឃើញនៅយប់ថ្ងៃចន្ទម្សិលមិញនេះ ក្រោយក្រុមសង្គ្រោះចំណាយពេលជាង២២០ម៉ោងដើម្បីស្វែងរក។
ក្រុមក្មេងប្រុសទាំងនោះត្រូវបានរកឃើញមុនគេបង្អស់ ដោយក្រុមអ្នកជ្រមុជទឹកអង់គ្លេស នៅចម្ងាយ៤០០ម៉ែត្រពីតំបន់ Pattaya Beach ក្នុងរូងភ្នំថាំហ្លួង ខេត្តឈៀងរ៉ាយ ប្រទេសថៃ។
ក្រុមជ្រមុជទឹកអង់គ្លេសនោះ រួមមាន លោក Richard Stanton, លោក Robert Harper និង លោក John Volanthen។ ពួកគេគឺជាអ្នកជំនាញសកលសម្រាប់ការរុករកក្នុងប្រព័ន្ធក្រោមដី ហើយត្រូវបានបញ្ជូនឲ្យមកចូលរួមការរុករកខាងលើ ដោយសារតែពួកគេមានសមត្ថភាពអស្ចារ្យបំផុតសម្រាប់ការងារមួយនេះ។
អនុប្រធានក្រុមប្រឹក្សាសង្គ្រោះរបស់ចក្រភពអង់គ្លេស British Cave Rescue Council លោក Bill Whitehouse បាននិយាយថា «ពួកគេមានបទពិសោធន៍ និងអាចធ្វើការងារនេះបាន។ ពួកគេធ្លាប់បានធ្វើការរុករកជុំវិញពិភពលោក»។
ប្រធានក្រុមកងទ័ពជើងទឹក Anand Surawan បានបញ្ជាក់ថា «យើងនឹងរៀបចំបញ្ជូនអាហារបន្ថែមទៅឲ្យពួកក្មេងៗដើម្បីធានាថា ពួកគេអាចបរិភោគគ្រប់គ្រាន់មានកម្លាំង និងជួយបង្វឹកពួកគេឲ្យចេះហែលជ្រមុជទឹក ខណៈដែលយើងបន្តព្យាយាមបូមទឹកចេញផងនោះ»។
យ៉ាងណាមិញពាក់ព័ន្ធនឹងសុខភាពរបស់ក្មេង អភិបាលខេត្តឈៀងរ៉ាយបានបញ្ជាក់ថា គ្រូពេទ្យបានផ្តល់ប្រឹក្សាយោបល់ថា ក្រុមសង្គ្រោះគួរបន្តផ្តល់ថ្នាំច្រើនប្រភេទដើម្បីជួយការពារមេរោគឆ្លង ឬជំងឺផ្សេងទៀត ដែលអាចធ្វើឲ្យពួកគេមានបញ្ហាសុខភាពនិងពិបាកជម្លៀសចេញមកក្រៅនោះ។
សូមបញ្ជាក់ថា ក្មេងប្រុសថៃទាំង១២នាក់ រួមទាំងគ្រូបង្វឹកម្នាក់ផងនោះ គឺនៅរស់រានមានជីវិតទាំងអស់គ្នា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។