មាស សាលី ទម្លាយខ្ទេចរឿង ចាន់ សម័យ ធ្លាក់ខ្លួននៅផ្ទះជួលនិងដើរស្ទូចត្រីចិញ្ចឹមក្រពះ
ភ្នំពេញ ៖ លោក មាស សាលី ត្រូវជាមិត្តភក្ត្រិស្និទ្ធស្នាល បានចុះទៅដល់ផ្ទះជួល ចាន់ សម័យ ភ្លាមៗដើម្បីឲ្យដឹងការពិត បន្ទាប់ពីទទួលដំណឹងថា លោក ចាន់ សម័យ ធ្លាក់ខ្លួនរស់នៅក្នុងផ្ទះជួល ហេីយដើរស្ទូចត្រីដេីម្បីចិញ្ចឹមក្រពះតាមមាត់ទន្លេ។
តារាចម្រៀងដែលទើបតែបញ្ចេញ MV ថ្មី លោក មាស សាលី ឲ្យដឹងថា លោក ចាន់ សម័យ ធ្លាក់ខ្លួនដើរស្ទូចត្រី និងរស់នៅផ្ទះជួលជាការពិត ព្រោះកាលពីម្សិលមិញលោក បានទៅដល់ផ្ទះតារាចម្រៀងរូបនេះដោយផ្ទាល់នៅម្ដុំជ្រោយចង្វា ឃើញថាជីវភាពពិតជាយ៉ាប់យឺុនខ្លាំង មិនធូរធារ ដូចពេលមុនឡើយ។ ខ្លួនមានអារម្មណ៍អាណិត និងសោកស្ដាយយ៉ាងខ្លាំងមិនគួរពួកម៉ាក់ជាទីស្រឡាញ់ធ្លាក់ខ្លួនដល់ថ្នាក់នេះសោះ។
លោកថា “មូលហេតុដែលគាត់ធ្លាក់ខ្លួនទៅជាបែបនេះ ដោយសារតែគាត់បរាជ័យក្នុងការរកសីុ ត្រូវបានចោរលួចកាបូបលុយ ហើយអំឡុងពេលនេះទោះបីជាមានកម្មវិធីហៅគាត់ទៅច្រៀង ក៏គាត់មិនបានទៅដែរ ព្រោះគាត់មានរបេងឆ្អឹងឈរមិនបានយូរ ត្រឹម ៥នាទីអីហ្នឹងគាត់ឈឺហើយ”។
មាស សាលី ថា នៅពេលដែល ចាន់ សម័យ ឈរច្រៀងយូរមិនបានដូចពេលមុនធ្វើឲ្យម្ចាស់កម្មវិធីគេមិនសប្បាយចិត្ត។ ដូច្នេះពេលកម្មវិធីទាក់ទងឲ្យម្ចាស់បទ “មិនអាចគ្មានអូន” ឲ្យទៅច្រៀងលោក តែងតែបដិសេធជានិច្ច ព្រោះខ្លាចបំពេញការងារឲ្យគេមិនបានល្អ ។
ចំណែកឯ ចាន់ សម័យ ទោះបីជាមិត្តភក្ដ្រិសិល្បៈ មួយចំនួនបានអះអាងថា តារាចម្រៀងរូបនេះពិតជាធ្លាក់ខ្លួនដុនដាមក្ដីមកដល់ពេលនេះ លោកនៅតែ មិនចេញមុខបកស្រាយអ្វីឡើយ។ ចំណែកទូរស័ព្ទហៅចូលមិនមានអ្នកទទួល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។