មនុស្សពីរនាក់ស្លាប់ ហាសិបនាក់ផ្សេងទៀតសង្គ្រោះនៅមន្ទីរពេទ្យសង្ស័យពុលស្រាស
ក្រចេះ ៖ តាមប្រភពព័ត៌មានពីមន្ត្រីមន្ទីរសុខាភិបាលខេត្តក្រចះបានឲ្យដឹងថា ប្រជាពលរដ្ឋពីរនាក់បានស្លាប់ នឹងជិតហាសិបនាក់ផ្សេងទៀតកំពុងសង្គ្រោះនៅមន្ទីរពេទ្យខេត្ត ដោយមានអាការៈវិលមុខ ចុកដើមទ្រូង ស្រវាំងភ្នែក នឹងឈឺក្បាល។ ហេតុការណ៏នេះបានកេីតឡេីងក្នងភូមិស្នួលកើត ឃុំស្នួល ស្រុកស្នួល ខេត្តក្រចេះ កាលពីយប់ថ្ងៃទី១៣ខែកក្កដាឆ្នាំ២០១៨។
ប្រភពព័ត៌មានដដែលបានបញ្ជាក់ថា ប្រជាពលរដ្ឋរងគ្រោះទាំងនោះប្រហែលជាពុលស្រាស ព្រោះពួកគេទទួលទានស្រាសក្នុងពិធីបុណ្យសពរបស់អ្នកភូមិ បន្ទាប់មកពួកគេស្រាប់តែមានអាការៈពុលហើយត្រូវបានក្រុមគ្រួសារដឹកបញ្ជូនមកសម្រាកព្យាបាលនៅមន្ទីរពេទ្យ។
មន្ត្រីមន្ទីរសុខាភិបាលខេត្តក៏បានពន្យល់ដល់ប្រជាពលរដ្ឋផ្សេងទៀតផងដែរ ដេីម្បីបញ្ឈប់ការផឹកស្រាសជាបណ្ដោះអាសន្ន ទន្ទឹមនឹងនោះ ខាងមន្ទីរជំនាញកំពុងស្រាវជ្រាវហើយយកស្រាទាំងនោះទៅពិសោធន៍នៅក្រសួងសុខាភិបាល។
សូមជម្រាបថា មកដល់ព្រឹកថ្ងៃទី ១៤ កក្កដានេះ មានអ្នករងគ្រោះតែម្ភៃនាក់ប៉ុណ្ណោះកំពុងសម្រាកព្យាបាលបន្តនៅមន្ទីរពេទ្យ ចំណែកអ្នកផ្សេងទៀតត្រលប់ទៅផ្ទះវិញដោយពួកគាត់បានធូរស្បេីយ៕
ប្រជាពលរដ្ឋរងគ្រោះកំពុងសម្រាកព្យាបាលនៅមន្ទីរពេទ្យ (រូបថតសារព័ត៌មានរស្មីកម្ពុជា)
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។