អាស៊ានមិនទាន់អាចតែងតាំងឧបការីដោះស្រាយវិបត្តិមីយ៉ាន់ម៉ានៅឡើយ
នៅក្នុងកិច្ចប្រជុំអាស៊ានកាលពីថ្ងៃទី២៤ខែមេសានៅរដ្ឋធានីចាការតា ប្រទេសឥណ្ឌូនេស៊ីមេដឹកនាំអាស៊ាន បានឯកភាពគ្នា៥ចំណុចស្តីពីដំណោះស្រាយវិវាទមីយ៉ាន់ម៉ា ដោយក្នុងនោះបានស្នើឲ្យបញ្ចប់ជាបន្ទាន់រាល់អំពើហិង្សានៅក្នុងប្រទេសនេះ។ ប៉ុន្តែមកទល់ពេលនេះមិនទាន់មានការតែងតាំងនៅឡើយទេ ហើយស្ថានភាពនៅក្នុងប្រទេសមីយ៉ាន់ម៉ា នៅតែតានតឹងដដែល។
ការអំពាវនាវរបស់ឥណ្ឌូនេស៊ីកើតឡើងក្រោយពេលមួយខែដែលអាស៊ានបើកកិច្ចប្រជុំហើយឯកភាពគ្នា ក្នុងការស្វែងរកដំណោះស្រាយបញ្ចប់វិវាទនៅប្រទេសតំបន់អាស៊ានមួយនេះ។ នៅថ្ងៃទី២ខែមិថុនា រដ្ឋមន្ត្រីការបរទេសឥណ្ឌូនេស៊ី លោកស្រី Retno Marsudi បានអំពាវនាវដល់សមាគមន៍អាស៊ាន តែងតាំងឧបការី ទទួលបន្ទុកដោះស្រាយវិវាទនយោបាយនៅក្នុងប្រទេសមីយ៉ាន់ម៉ា។
មានប្រសាសន៍នៅក្នុងកិច្ចប្រជុំ អនឡាញនៅទីក្រុងចាការតា លោកស្រី Retno Marsudi បានបញ្ជាក់ថា«ការតែងតាំងឧបការី ចាំបាច់ត្រូវតែធ្វើឡើងជាបន្ទាន់ ហើយការទំនាក់ទំនងភាគីទាំងពីរនៅមីយ៉ាន់ម៉ាចាំបាច់ត្រូវតែរក្សាភ្ជាប់ជានិច្ច។
អាស៊ានបានខិតខំតាមរយៈកិច្ចការបរទេសស្តីពីវិវាទនៅក្នុងប្រទេសមីយ៉ាន់ម៉ា ចាប់តាំងពីប្រទេសធ្លាក់ក្នុងវិវាទជាថ្មីក្រោយការធ្វើរដ្ឋប្រហារនៅថ្ងៃទី១ខែកុម្ភៈ។ កម្លាំងទាហានបានចាប់ខ្លួនប្រធានាធិបតី និងលោកស្រីអោងសានស៊ូជីមេដឹកនាំគណបក្សសម្ព័ន្ធមិត្តជាតិដើម្បីប្រជាធិបតេយ្យ។
នៅថ្ងៃទី១ខែមិថុនា អគ្គលេខាអាស៊ាន មានគម្រោងទៅកាន់ប្រទេសមីយ៉ាន់ម៉ា ក្នុងពេលដ៏ខ្លីខាងមុខ ដើម្បីតាមដានការអនុវត្តកិច្ចព្រមព្រៀង ៥ចំណុចដែល អាស៊ានបានព្រមព្រៀង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។