ព្រឹកនេះ កម្ពស់ទឹកទន្លេមេគង្គ ខេត្តស្ទឹងត្រែង ក្រចេះ និងកំពង់ចាម ស្រកចុះមួយកម្រិតមកវិញ
យោងតាមសេចក្តីជូនដំណឹងរបស់ក្រសួងធនធានទឹក និងឧតុនិយម បានឲ្យដឹងថា ទឹកទន្លេមេគង្គ នៅខេត្តស្ទឹងត្រែង ក្រចេះ និងខេត្តកំពង់ចាម បានបន្តស្រកចុះ នៅព្រឹកថ្ងៃទី២៧ ខែសីហា ឆ្នាំ២០១៨ នេះ ។ រីឯទន្លេបាសាក់-ចតុមុខ រាជធានីភ្នំពេញ និងទន្លេមេគង្គក្រោម អ្នកលឿង ខេត្តព្រៃវែង នៅតែបន្តឡើងបន្តិច ។
ក្រសួងធនធានទឹក និងឧតុនិយម បានប្រកាសថា ទន្លេបាសាក់-កោះខែល ក្នុងខេត្តកណ្តាល នាព្រឹកថ្ងៃទី២៧ ខែសីហា នេះ ទឹកស្ថិតលើកម្រិតប្រកាសឲ្យប្រុងប្រយ័ត្ន។ ចំណែកទន្លេសាប-ព្រែកក្តាម និងបឹងទន្លេសាប-កំពង់លួង ទឹកបន្តឡើងបន្តិចបន្តួច។
ក្រសួងបញ្ជាក់ថា តាមការព្យាករណ៍នៅថ្ងៃទី២៨-៣០ ខែសីហា ឆ្នាំ២០១៨ ខាងមុខ កម្ពស់ទឹកទន្លេមេគង្គ-ស្ទឹងត្រែង ក្រចេះ និងនៅទន្លេមេគង្គ ក្នុងខេត្តកំពង់ចាម នឹងបន្តស្រកចុះ។ ចំណែកទន្លេបាសាក់-ចតុមុខ ភ្នំពេញ ទឹកបន្តឡើង នៅថ្ងៃទី២៨-២៩ ខែសីហា ឆ្នាំ២០១៨ ហើយនៅថ្ងៃទី៣០ ខែសីហា ឆ្នាំ២០១៨ ទឹកនឹងស្រកមកវិញ។ ដោយឡែក នៅទន្លេមេគង្គ-អ្នកលឿង ក្នុងខេត្តព្រៃវែង ទន្លេបាសាក់-កោះខែល និងទន្លេសាប-ព្រែកក្តាម ក្នុងរយៈពេល ៣ ថ្ងៃ គិតពីថ្ងៃទី២៨-៣០ ខែសីហា ឆ្នាំ២០១៨ ទឹកនឹងបន្តឡើង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។