ក្រុមហ៊ុនអាកាសចរជាតិចិន Air China គ្រោងបើកជើងហោះហើរត្រង់ពីក្រុងប៉េកាំង មករាជធានីភ្នំពេញ នៅដើមខែវិច្ឆិកាខាងមុខ
ក្នុងជំនួបជាមួយលោកនាយឧត្តមសេនីយ៍ ម៉ៅ ហាវណ្ណាល់ រដ្ឋលេខាធិការនៃរដ្ឋលេខាធិការដ្ឋាន អាកាសចរស៊ីវិល កាលពីថ្ងៃម្សិលមិញ តំណាងក្រុមហ៊ុនអាកាសចរជាតិ នៃសាធារណៈរដ្ឋប្រជាមានិតចិន (Air China) បានបង្ហាញពីគោលបំណង នៃក្រុមហ៊ុនអាកាសចរជាតិចិនមួយនេះ ចង់ធ្វើការហោះហើរត្រង់ផ្ទាល់ ពីរដ្ឋធានីប៉េកាំង មកកាន់រាជធានីភ្នំពេញ នៅថ្ងៃទី១ ខែវិច្ឆិកា ខាងមុខនេះ ដើម្បីជាការឆ្លើយតបទៅនឹងទំនាក់ទំនងល្អ រវាងប្រទេសទាំង២ កំណើននៃភ្ញៀវទេសចរចិន ពង្រឹងការលើកកំពស់ ការតភ្ជាប់ការហោះហើរ រវាងប្រទេសទាំងពីរ ជំរុញកំណើនភ្ញៀវទេសចរ និងជំរុញកំណើនសេដ្ឋកិច្ចជាតិ។
ក្នុងជំនួបពិភាក្សានោះ នាយឧត្តមសេនីយ៍បណ្ឌិត ម៉ៅ ហាវណ្ណាល់ បានថ្លែងថា ក្នុងនាមថ្នាក់ដឹកនាំ របស់រដ្ឋលេខាធិការដ្ឋានអាកាសចរស៊ីវិល សូមធ្វើការគាំទ្រដល់ក្រុមហ៊ុនអាកាសចរជាតិ នៃសាធារណៈរដ្ឋប្រជាមានិតចិន និងជួយសម្រួលបែបបទបច្ចេកទេសនានា ធ្វើយ៉ាងណាឲ្យមានការហោះហើរត្រង់ មកតាមពេលវេលាដែលបានគ្រោងទុក គឺការហោះហើរនឹងចាប់ផ្តើមនាថ្ងៃទី០១ ខែវិច្ឆិកា ឆ្នាំ២០១៨ ដោយប្រើយន្តហោះប្រភេទ Airbus 320 ហោះហើរ០៣ ជើងក្នុង១សប្តាហ៍។
- លើសពីនេះទៅទៀត នាយឧត្តមសេនីយ៍បណ្ឌិត ម៉ៅ ហាវណ្ណាល់ បានគូសបញ្ជាក់ថា តាមរយៈការហោះហើរត្រង់រវាង រដ្ឋធានីប៉េកាំង មកកាន់រាជធានីភ្នំពេញ នឹងជំរុញនូវចំណងមិត្តភាព ប្រទេសទាំង២ កាន់តែជិតកំណើនអ្នកដំណើរតាមផ្លូវអាកាស កាន់តែច្រើនថែមទៀត និងមានការផ្លាស់ប្តូរពាណិជ្ជកម្ម រវាងប្រទេសទាំង២កាន់តែល្អប្រសើរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។