រដ្ឋមន្ត្រីក្រសួងមហាផ្ទៃ បញ្ជាឲ្យរាជធានី-ខេត្ត ៣ បង្ក្រាបក្លឹបកម្សាន្តដែលចែកចាយគ្រឿងញៀន
សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានបញ្ជាឲ្យអភិបាលរាជធានី-ខេត្ត ជាពិសេសរាជធានីភ្នំពេញ ខេត្តព្រះសីហនុ និងខេត្តសៀមរាប យកចិត្តទុកដាក់ដោះស្រាយ និងបង្ក្រាបការចែកចាយគ្រឿងញៀននៅតាមរង្គសាល។
សម្តេចក្រឡាហោម បញ្ជាក់ថា “យើងមិនមែនបង្ក្រាបកន្លែងកម្សាន្តទេ គឺយើងបង្ក្រាបគ្រឿងញៀន ពីព្រោះច្បាប់អនុញ្ញាតឲ្យបើកកន្លែងកម្សាន្ត តែមិនអនុញ្ញាតឲ្យចែកចាយគ្រឿងញៀនទេ”។
សម្ដេចបានលើកឡើងយ៉ាងដូច្នេះ នៅក្នុងវេទិកាអន្តរសាសនាថ្នាក់ជាតិ នៅកម្ពុជាលើកទី២ ពិធីសូត្រធម៌ អធិដ្ឋាន បញ្ជូនសារដើម្បីប្រឆាំងការជួញដូរមនុស្ស និងបញ្ចប់ទាសភាពសម័យទំនើប នារសៀលថ្ងៃទី៣០ ខែសីហា ឆ្នាំ២០១៨ នៅមជ្ឈមណ្ឌលពិពណ៌ និងសន្និបាតកោះពេជ្រ។
សម្ដេច ស ខេង ក្នុងវេទិកាអន្តរសាសនាថ្នាក់ជាតិ នៅកម្ពុជាលើកទី២ ពិធីសូត្រធម៌ អធិដ្ឋាន បញ្ជូនសារដើម្បីប្រឆាំងការជួញដូរមនុស្ស និងបញ្ចប់ទាសភាពសម័យទំនើប នារសៀលថ្ងៃទី៣០ ខែសីហានេះ
សម្តេច ស ខេង បានសង្កត់ធ្ងន់ថា បើម្ចាស់រង្គសាលអនុញ្ញាតឲ្យគេចែកចាយគ្រឿងញៀននៅក្នុងរង្គសាលរបស់ខ្លួន គឺម្ចាស់រង្គសាលត្រូវតែទទួលខុសត្រូវចំពោះមុខច្បាប់។
សម្ដេចក្រឡាហោមបន្ថែមថា៖ “ឥឡូវនេះ វិធីមានពីរយ៉ាង ទី១. ក្តាប់ព័ត៌មានបានទៅបង្ក្រាប ប៉ុន្តែកុំយល់ច្រឡំថា ទៅបង្ក្រាបកន្លែងកម្សាន្តដែលមានច្បាប់អនុញ្ញាត គឺយើងបង្ក្រាបគ្រឿងញៀននៅនឹងកន្លែងកម្សាន្តនោះ និងទី២. ប្រកាសជាជំហរសុំឲ្យលុបបំបាត់ដោយខ្លួនឯង…”។
ជាមួយគ្នានេះ សម្តេចក្រឡាហោម ស ខេង បានបញ្ជាដោយផ្ទាល់មាត់ឲ្យលោកនាយឧត្តមសេនីយ៍ ជួន សុវណ្ណ ស្នងការនគរបាលរាជធានីភ្នំពេញ និងលោកឃួង ស្រេង អភិបាលរាជធានីភ្នំពេញ ធ្វើការបង្ក្រាបទីតាំងក្លឹបកម្សាន្តមួយចំនួននៅក្នុងរាជធានីភ្នំពេញ ដែលមានការចែកចាយគ្រឿងញៀន ពីព្រោះនៅរាជធានីភ្នំពេញ មិនទាន់ឃើញបង្ក្រាបនៅឡើយទេ។
ជាចុងក្រោយ រដ្ឋមន្ត្រីក្រសួងមហាផ្ទៃ ក៏បានផ្តាំទៅម្ចាស់រង្គសាល និងកន្លែងកម្សាន្ត ឬភោជនីយដ្ឋាន ដែលមានការលួចលាក់ចែកចាយគ្រឿងញៀន សូមបញ្ឈប់ជាបន្ទាន់ ហើយបើមិនបញ្ឈប់ទេ សមត្ថកិច្ចនឹងទៅបង្ក្រាប មិនត្រឹមតែបង្ក្រាបទេ គឺថែមទាំងប្រឈមមុខនឹងការបិទអាជីវកម្ម ពីព្រោះរឿងនេះ រឿងសង្គម មិនមែនរឿងបុគ្គលណា ក្រុមណានោះទេ គឺការទទួលខុសត្រូវក្នុងការគ្រប់គ្រងសន្តិសុខ សណ្តាប់ធ្នាប់សាធារណៈសង្គម សុខមាលភាពសង្គមរបស់យើង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។