លោក ហេង សំហៃ មេស្នាក់ការគយផែកែវផុសត្រូវគេទម្លាយថាឃុបឃិតជាមួយឈ្មួញឱ្យនាំចូលទំទិញដោយបង់ពន្ធជូនរដ្ឋមិនគ្រប់
មេគយប្រចាំកំពង់ផែកែវផុស ឧកញ៉ា ម៉ុង ឬទ្ធី ក្នុងភូមិឬទ្ធី១ ឃុំកែវផុស ស្រុកស្ទឹងហាវ ខេត្តព្រះសីហនុ ត្រូវបានមន្ត្រីផ្ទៃក្នុងរាយការណ៍ទម្លាយមកថា មានការឃុបឃិតជាមួយក្រុមឈ្មួញរកស៊ី បើកភ្លើងខៀវឱ្យនាំចូលនូវទំនិញដោយរៀបចំឯកសារបង់ពន្ធជូនរដ្ឋមិនគ្រប់។
ប្រភពមន្ត្រីផ្ទៃក្នុង បាននិយាយថា ទូក និងកប៉ាល់ដឹកទំនិញគ្រប់ប្រភេទយ៉ាងគគ្រឹកគគ្រេង ដែលចូលកំពង់ផែកែវផុស ឧកញ៉ា ម៉ុង ប៉ុន្តែមិនដែលឃើញភ្នាក់ងារគយចុះត្រួតពិនិត្យ និងវាយតម្លៃលើមុខទំនិញទាំងនេះឡើយ។ មន្ត្រីដដែលបានបន្តទៀត ជារៀងរាល់ថ្ងៃ មានរថយន្តយីឌុបជាច្រើ្នគ្រឿងចូលដឹកទំនិញចេញពីកំពង់ផែកែវផុសខេត្តព្រះសីហនុរាប់រយគ្រឿងក្នុងមួយថ្ងៃៗ។
ប្រភពពីមន្ត្រីក៏បានបង្ហើបទម្លាយបន្ថែមថា រាល់ទំនិញដែលចូលតាមច្រកកំពង់ផែកែវផុសរបស់លោកឧកញ៉ា ម៉ុង ឬទ្ធី យ៉ាងគគ្រឹកគគ្រេងមានទាំងទំនិញគេចពន្ធ និងបង់ពន្ធមិនគ្រប់ ព្រោះមេស្នាក់ការគយប្រចាំការនៅស្នាក់ការគយ និងរដ្ឋាករកែវផុស មិនបានចុះត្រួតពិនិត្យ និងវាយតម្លៃឱ្យបានត្រឹមត្រូវ ដើម្បីប្រមូលពន្ធជូនរដ្ឋឡើយ។ ប្រភពដដែលបានបន្តថា លោក ហេង សំហៃ ប្រធានស្នាក់ការគយ និងរដ្ឋាករ អង្គុយចាំស៊ីញ៉េលើឯកសារទាក់ទងនឹងការនាំទំនិញចូលពីប្រទេសថៃ និងប្រថាប់ត្រាតែប៉ុណ្ណោះ រឿងពិនិត្យឱ្យបានម៉ត់ចត់គ្មានទេ ទង្វើរបែបនេះនាំឱ្យបាត់បង់ចំណូលរដ្ឋយ៉ាងច្រើនសន្ធឹកសន្ទាប់ក្នុងមួយខែៗ។
ប្រភពបញ្ជាក់ថា ទំនិញដែលនាំចូលតាមច្រកកំពង់ផែកែវផុសនេះ មានសម្ភារៈសំណង់ (ដែក ,ឥដ្ឋការ៉ូ ,ទុយោជ័រ ,ស៊ីម៉ង់ស៍), គ្រឿងទេស, ភេទសជ្ជៈគ្រប់ប្រភេទ,គ្រឿងអេឡិចត្រូនិច, ធ្យូងថ្ម, ម៉ូតូ និងទំនិញជាច្រើនទៀតផងដែរ។
មន្ត្រីកំពង់ផែកែវផុស ទាំងអស់រងចាំមើល លោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ និងលោក គុណ ញឹម អគ្គនាយកគយ មានចំណាត់ការបែបណាទៅលើមន្ត្រីខិលខូចប្រព្រឹត្តអំពើពុករលួយ កេងប្រវ័ញថវិការជាតិដែលធ្វើឲ្យបាត់ចំណូលពន្ធរដ្ឋយ៉ាងច្រើន ធ្វើមានធ្វើបានដាក់ហោប៉ៅខ្លួននិងបក្ខពួក។
ពាក់ព័ន្ធនិងការប្រព្រឹត្តអំពើពុករលួយខាងលើអង្គភាពនេះទាក់ទងសុំការបំភ្លឺពីលោក ហេង សំហៃ ប្រធានស្នាក់ការគយ និងរដ្ឋាករកែវផុសនោះបាននៅឡើយទេ។ ជុំវិញរឿងនេះ អង្គភាពយើងនិងបន្តផ្សាយករណីនេះឲ្យពិស្តារបន្ថែម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។