នគរបាលជាតិ ចាប់ផ្តើមរឹតបន្តឹងប័ណ្ឌបើកបរអន្តរជាតិ ខណៈជនជាតិចិន មករស់នៅកាន់តែច្រើន
រាជធានីភ្នំពេញ ៖ លោកនាយឧត្តមនីយ៍ ហ៊ឹម យ៉ាន អគ្គស្នងការរងនគរបាលជាតិបានអះអាងថា នគរនឹងចាប់ផ្តើមរឹតបន្តឹងប័ណ្ណបើកបរអន្តរជាតិ ខណៈមានជនបរទេសកាន់តែច្រើននៅប្រទេសកម្ពុជា ហើយពួកគេបានបើករថយន្តដោយខ្លួនឯង និងបរទេសខ្លះមានតែប័ណ្ណបើកប្រទេសខ្លួន ហើយពុំមានប័ណ្ណបើកបរកម្ពុជា ។
ថ្លែងនៅក្នុងពិធីបើកវគ្គផ្សព្វផ្សាយស្តីពីការត្រួតពិនិត្យលើប័ណ្ណបើកបរអន្តរជាតិ នៅព្រឹ កថ្ងៃទី២៩ខែមិថុនា ឆ្នាំ២០១៨នេះនៅសាលប្រជុំអគ្គស្នងការដ្ឋាននគរបាលជាតិ លោកនាយឧត្តមសេនីយ៍ហ៊ឹម យ៉ាន អគ្គស្នងការរងដ្ឋាននគរបាលជាតិបានឲ្យលើកឡើងថា គ្រប់រាជធានីខេត្តទាំងអស់ត្រូវតែត្រួតពិនិត្យឲ្យបានត្រឹមត្រូវ ចំពោះប័ណ្ណបើកបររបស់បរទេស ពីព្រោះមានបរទេសខ្លះមានតែប័ណ្ណបើកបរប្រទេសគេហើយ ពុំមានឯកសារ និងប័ណ្ណបើកបរនៅស្រុកខ្មែរ ។
យោងតាមគេហទំព័ររបស់អគ្គស្នងការនគបាលជាតិបានឲ្យដឹថាលោក នាយឧត្តមសេនីយ៍អគ្គស្នងការរងនគរបាលជាតិបានអះអាងយ៉ាងដូច្នេះថា«ចាប់ពីពេលនេះតទៅជនបរទេសណាក៏ដោយដាច់ខាតត្រូវតែមានបណ្ណបើកបរប្រទេសខ្លួនលិខិតឆ្លងដែនផ្សំជាមួយ ហើយត្រូវមានប័ណ្ណបើកបរនៅស្រុកខ្មែរផងដែរ តែប្រសិនបើពួកគេមានតែរបស់ខ្លួន ហើយពុំមានរបស់ខ្មែរត្រូវចាត់វិធានការណ៍ទៅតាមច្បាប់ជាធរមាន» ។
ជាមូយគ្នានោះដែរលោក នាយឧត្តមសេនីយ៍ ហ៊ឹម យ៉ានក៏បានគូសបញ្ជាក់បន្ថែមថា ការប្រើប្រាស់ប័ណ្ណបើកបរអន្តរជាតិត្រូវភ្ជាប់ជាមួយប័ណ្ណបើកបរជាតិរបស់ជនបរទេសនោះ ដោយហេតុថា ប័ណ្ណបើកបរអន្តរជាតិជាឯកសារចម្លងពីឯកសារដើម គឺប័ណ្ណបើកបរជាតិរបស់ជនបរទេសនោះ ហើយត្រូវពិនិត្យផ្ទៀងផ្ទាត់តាមសៀវភៅគំរូប័ណ្ណបើកបររបស់ប្រទេសនីមួយៗហើយករណីមានការសង្ស័យស្នើសុំការសហការបញ្ជាក់ពីស្ថានទូតប្រទេសនោះ ។
សូមបញ្ជាក់ថា គោលបំណងនៃការរៀបចំកិច្ចប្រជុំនេះ ដើម្បីលើកកម្ពស់សមត្ថភាព និងជំនាញ ដល់មន្ត្រីនគរបាលចរាចរណ៍ផ្លូវគោក ក្នុងការពិនិត្យឲ្យបានត្រឹមត្រូវលើប័ណ្ណបើកបរអន្តរជាតិ ព្រមទាំងស្វែងយល់បន្ថែមពីលិខិតបទដ្ឋានពាក់ព័ន្ធដូចជា អនុសញ្ញាអន្តរជាតិស្តីពីបណ្ណបើកបរអន្តរជាតិ និងកិច្ចព្រមព្រៀងទទួលស្គាល់ប័ណ្ណបើកបរទៅវិញទៅមកទ្វេភាគី ឬពហុភាគីជាមួយកម្ពុជាជាដើម ។
សូមជម្រាបថា ការលើករបស់លោកឧត្តមសេនីយ៍ហ៊ឹម យ៉ាន ខណៈដែលមានករណីជន បរទេសមួយចំនួនបានបើកបរនៅកម្ពុជាដោយគ្មានបណ្ណបើកបរ ហើយបណ្តាលឲ្យមានគ្រោះថ្នាក់ចរាចរណ៍ជាច្រើនករណី ពិសេសនោះគេសង្កេតឃើញភាគច្រើនជនជាតិចិន ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។